Bræðratvíeykið Andy Svarthol tilkynnir rafræna útgáfu þriðju smáskífu þeirra, Oculi Cordis, sem kom út þann 26. febrúar síðastliðinn.

Tónlistarmaðurinn Auður frumsýnir nú myndband við lagið “Both Eyes on You” á YouTube.

Myndbandið var tekið upp á tveimur helgum í Reykjavík og leikstýrt af Helga Jóhannssyni og Herði Sveinssyni og framleitt af Dóttir.

Tónlistarkonan Soffía Björg sendir nú frá sér nýtt lag og myndband sem frumflutt/frumsýnt var á tónlistarsíðunni áhrifamiklu Stereogum. Lagið er ‘The Road’ og er annað lag Soffíu af væntanlegri frumraun hennar sem kemur út á næsta ári sem Ben Hillier (Blur, Elbow, Doves, Graham Coxon) stjórnaði upptökum á í Sundlauginni í Mosfellsbæ. Tónlistarfólkið Pétur Ben, Ingibjörg Elsa og Kristofer Rodriquez spiluðu inn á lagið með henni en leikstjórn myndbandsins var í höndum Melvin Krane & Associates.

“Söngur Valkyrjunnar” er fyrsta lagið sem tónlistarkonan MIMRA sendir frá sér. Lagið er, eftir því sem stendur í fréttatilkynningu, “í senn gruggugt og draumkennt og textinn goðsagnakenndur. Lágstemmdur hljóðheimurinn rís, hnígur og vex með rödd MIMRU í þungamiðju.”

MIMRA er listamannsheiti Maríu Magnúsdóttur. Hún lauk nýlega námi frá Goldsmiths University of London við deildina Popular Music, þaðan hafa m.a. James Blake og Rosie Lowe útskrifast. Lagið “Söngur Valkyrjunnar” varð fyrr á þessu ári hluti af NX Records Mixtape 2016, tekið saman af Semi Precious.

Gísli Þór Ólafsson er merkilegur listamaður. Í vor kom út 4. sólóplata Gísla Þórs sem nefnist Gillon og er nefnd eftir flytjandanafni hans. Á plötunni eru 8 lög eftir Gísla og á hann sex af textunum, en tveir af þeim eru ljóð eftir Ingunni Snædal úr ljóðabók hennar Komin til að vera, nóttin (2009).

Platan var tekin upp í Stúdíó Benmen á Sauðárkróki og var upptökustjórn í höndum Sigfúsar Arnars Benediktssonar, félaga Gísla í hljómsveitinni Contalgen Funeral. Sigfús hefur stjórnað upptökum á öllum hljómplötum Gísla.

Í tilefni af 10 ára útgáfuafmæli Gísla Þórs og útgáfu bókarinnar Safnljóð 2006-2016 hefur verið opnuð síðan á karolinafund.com til að styðja við útgáfuna. Í boði er árituð bók og einnig allar bækurnar áritaðar. Auk þess eru allar bækurnar og allir diskarnir í boði á einstöku tilboði, allt áritað, eða 10 titlar á aðeins 13.000 kr.

Nýlega kom út út á vegum Möller Records platan Svartir sandar með Bistro Boy. Platan sem inniheldur 10 lög en gestasöngvarar á plötunni eru Marty Byrne og Edward F. Butler. Platan er óður til uppeldisstöðva tónlistarmannsins, innblásin af andstæðum náttúrunnar, jöklum og svörtum söndum. Svartir sandar önnur breiðskífa Bistro Boy og hans fimmta útgáfa á vegum Möller Records.

Tvö lög með tónlistarmanninum Auði litu nýlega dagsins ljós. Lögin eru “3D” og “Both Eyes on You” og voru sett í samfellu á netið en þau verður að finna á væntanlegri frumraun Auðs, plötunni Alone. Auður er án efa ein skærasta vonarstjarna íslenskrar tónlistar og eflaust margir sem bíða spenntir eftir væntanlegri plötu. Lögin tvö, sem heyra má hér að neðan, stytta vonandi biðina eitthvað.

Heiða trúbador vinnur nú að framleiðslu á sólóplötu sinni sem nefnist Fast og er þetta fyrsta platan sem hún tekur upp og hljóðvinnur sjálf.

Á Fast eru 10 lög og textar eftir Heiðu en hún útsetur og leikur á öll hljóðfæri sjálf. Andri Geir Árnason, trommuleikari Hellvar og GlerAkurs leggur Heiðu lið við slagverk á plötunni auk þess sem Curver Thoroddsen hljóðblandaði og hljómjafnaði plötuna.

Söfnun fyrir framleiðslu og útgáfu plötunnur stendur nú yfir á Karolinafund.

Eina myndbandið sem gert hefur verið tengt útgáfunni er við lagið “Veerle” en það má sjá og heyra hér að neðan.

Dúóið Hugar hefur sent frá sér sína fyrstu smáskífu þar sem Arnór Dan úr Agent Fresco kemur fram sem gestasöngvari. Huga skipa þeir Bergur Þórisson og Pétur Jónsson en þeir hafa báðir verið viðriðnir tónlistarsköpun hverskonar hér á landi frá blautu barnsbeini.

Hugar koma fram á Iceland Airaves í kvöld, miðvikudaginn annan nóvember í Kaldalóni Hörpu kl. 22:20 og svo off-venue í Stúdentakjallaranum á föstudaginn kl. 16:00.

Hljómsveitin Vök hefur sent frá sér nýja smáskífu sem ber heitið “Show Me”. Lagið er það fyrsta sem þau gera með breska upptökustjóranum Brett Cox (Jack Garratt, Tusks) sem hefur verið að vinna með þeim að þeirra fyrstu breiðskífu sem mun líta dagsins ljós snemma á næsta ári.

Vök kemur fram á Iceland Airwaves tónlistarhátíðinni sem hefst í næstu viku þar sem hún spilar í Listasafni Reykjavíkur föstudagskvöldið 4. nóvember kl. 21:50. Þá spilar sveitin einnig á „off venue“ tónleikum á Slippbarnum fimmtudaginn 3. nóv.

Vínyllinn er fréttabéf sem kemur út einu sinni í viku. Með áskrift færðu afslátt í öllum betri búðum sem selja vínylplötur þ.á.m. Reykjavík Record Shop, Kaffi Vínyl, Hljómsýn, Smekkleysu, Lucky Records og Geisladiskabúð Valda. Einnig veita valdir aðilar aflslátt af plötuspilurum ofl.

Í fréttabréfinu er fullt af stöffi fyrir tónlistaráhugamenn um vínylplötur, tónlistarmenn, tónlistarstefnur, tónleika, fréttir úr tónlistabransanum, vínylbúðir heima og að heiman auk nördastöffs fyrir tónlistarnördinn.

Áskriftin, sem er uppsegjanleg, kostar 800 kr. á mánuði. Félagar í FÍH eða starfandi tónlistarmenn borga aðeins 500 kr. á mánuði.

Smellið hér til að kynna ykkur vef Vínylsins eða skellið ykkur beint á áskrift með því að smella hér.

Rúnar Þórisson heldur útgáfutónleika á Café Rosenberg, Klapparstíg 27. föstudaginn 15. janúar n.k. Eftir að hafa spilað með hljómsveitinni Grafík um langt skeið þá hóf Rúnar árið 2005 að gera sólóplötur og eru þær nú orðnar fjórar talsins auk þess sem hann hefur verið að spila töluvert á tónleikum og tónlistarhátíðum, nú síðast á Iceland Airwaves. Nýjasta platan Ólundardýr kom út 7. nóvember s.l. en að baki útgáfunni lá ákveðin hugmynd og hvati sem hófst í 12. janúar s.l. að fyrsta lagið kom út á vefnum og í kjölfarið eitt lag á mánuði þar til 7. nóvember að afraksturinn er allur gefinn út en þann dag hefði faðir Rúnars orðið áttræður. Umsagnir og dómar um Ólundardýr hafa verið mjög lofsamlegir og hefur hún ratað á nokkra lista yfir bestu plötur ársins 2015, m.a. hér á Rjómanum.

Ákveðin sérstaða er fólgin í því að með Rúnari vinna í tónlistinni tvær dætur hans, Lára og Margrét sem syngja, radda og spila á hljómborð en þær hafa báðar líka gefið út plötur á síðasta ári, Lára plötuna Þel og Margrét plötu með hljómsveitinni Himbrimi. Hljómsveit Rúnars skipa einnig Arnar Þór Gíslason á trommur og Birkir Rafn Gíslason á gítar og Guðni Finnsson á bassa en þeir hafa einnig leikið með hljómsveitum eins og Ensími, Himbrimi, Pollapönk og Mugison.

Útgáfu og viðburðafélagið FALK kynnir “AFSKRÆMINGU SVAVARS KNÚTS” einstakan tónlistarviðburð í Mengi, þar sem hljómfagrir tónar söngvaskáldsins Svavar Knúts drukkna í rafstraumum KRAKKKBOT og AMFJ.

Söngvaskáldið ástsæla Svavar Knútur mun ásamt raf- og óhljóðalistamönnunum KRAKKKBOT og AMFJ flytja lög sín í Mengi næstkomandi laugardagskvöld, 9. janúar klukkan 21:00 – húsið opnar klukkan 20:00.

Á tónleikunum mun Svavar leika úrval af lögum sínum á sinn einstaklega einlæga hátt, einn með gítarinn og röddina fögru. Hætt er þó við því að aðdáendum Svavars Knúts bregði í brún, því hljóð hans munu verða brotin og afskræmd, teygð og toguð, sléttuð og felld í meðförum þeirra félaga KRAKKKBOT og AMFJ.

Það verður sannkölluð hljóðveisla í Mengi þegar þessir andstæðu pólar mætast í samvinnu eða baráttu. Kvöldvaka sem fer allan skalann frá hinu mikilfenglega til hins viðkvæma, um ölduslóð sínusbylgjunnar að broti raddarinnar.

Hér að neðan má heyra viðtal tekið af Elísabetu Indru Ragnarsdóttur fyrir hönd Mengis, en þar ræða Baldur og Svavar Knútur um vináttu, andstæða póla í tónlist og hvers vænta má á laugardaginn kemur.

Hljómsveitin Aanonymous Band gaf nýverið frá sér plötuna Feelings. Sveitin var stofnuð 2013 og er þetta frumurður bandsins, sem eins og nafnið ber með sér, fer undir nafnaleynd.

Feelings er, eins og meðlmir sveitarinnar orða það sjálfir “…næstum því óþægilega hreinskilin plata um þunglyndi, angurð og fegurð lífsins. Platan er tekinn upp og mixuð með það í hugarfari að halda dínamíkinni og leyfa hlustandanum að upplifa nærveru hljómsveitarinnar.”

Aanonymous Band er partur af nýstofnuðum fjöllistahópi sem gengur undir nafninu Aanonymous Aart. Aanonymous hópurinn er og verður óskilgreindur hópur sem byrjaði með einfaldri hugmynd: að svala sköpunargáfunni með því að gera það sem þeim dettur í hug.

Myndverk (video) sköpuð af Ingimar Waage er hluti af framtakinu Aanonymous Aart, tvö verk eru nú þegar birt á heimasíðu Aanonymous. Ef að listamenn vilja leggja sitt af mörkum þá eru þeir hvattir til að hafa samband við Aanonymous (aanonymous@aanonymous.se). Hjálp við að hljóðsetja/klippa verður í boði og þeir sem leggja sitt af mörkum geta valið að taka þátt undir nafnleynd eða eigin nafni.

Plötunni er dreyft í tveimur útgáfum: “48/24 master edition” (Bandkamp) og 44/16 (Cdbaby, Itunes, Amazon o.s.frv.)

Laser Life raftónlistarverkefni listamannsins Breka Steins Mánasonar en hann sendir nú frá sér næsta lag af plötunni Polyhedron. Nýja lagið heitir “Dazed and Focused” og kemur út á Bandcamp en einnig í takmörkuðu upplagi á glærum sjö tommu vínyl.

Plöturnar eru framleiddar eftir pöntun af vinyll.is og stenslar Breki merki Laser Life á tómu hlið hverrar plötu. Hægt er að panta eintak af plötunni með því að senda póst á laserlifeiceland@gmail.com eða kaupa í gegn um Bandcamp.

Rjóminn vill vekja athygli á tónlist Kristínar Lárusdóttur. Lýsa má henni sem innblásinni af íslenskum tónlistararfi og náttúru. Hún spilar bæði á selló, kveður og notar ýmis rafhljóð. Tónlist Kristínar er lagræn, en líka tilraunakennd og smá teknó.

Hér að neðan má heyra plötu Kristínar, Hefring, en á henni sá hún sjálf um tónsmíðar, útsetningar, sellóleik, upptökur og hljóðblöndun. Orri Harðarson sá um hljómjöfnun.

Ég verð að vera hreinskilinn með að ekki fannst mér þetta tónlistarár sérlega merkilegt, hvort sem litið er til útgáfu hér heima eða erlendis. Þessu eru eflaust margir ósammála og tek ég hverskonar umræðu málefnalegri fagnandi, langi einhverjum þá á annað borð að sýna gömlum indíhundi eins og mér að ég hafi rangt fyrir mér. Tónlistarsmekkur fólks, sérstaklega þess sem reglulega treður marvaðann í stríðum tónlistarstraumum og stefnum, er einstaklega persónulegur og því oft erfitt að ræða hann án þess að tilfinningar ráði ferðinni. Ég er líka tilfinningavera mikil og á að til með að missa mig aðeins þegar tónlist og tónlistarumræða er annars vegar. Eins og ég er kannski að gera hér.

En hvað um það.

Ég leita mikið eftir tilfinningum í tónlist og þær kann oft að vanta þó ástríðan sé vissulega fyrir hendi. Í ár fannst mér skorta tilfinningar í tónlist, svona almennt séð. Það er eins og of margir tónlistarmenn séu að reyna að vera eitthvað annað en þeir eru, reyna að fanga einhverja ímynd sem hæfir þeim ekki, reyna að líkjast einhverjum öðrum eða þá að forðast samlíkingu við aðra. Á endanum fer þetta allt að renna saman í eitt og hljóma eins og eitthvað miðmoð, einhverskonar tónlistarleg málamyndun, sem fólk er hvorki með eða á móti. Lög taka að hljóma eins og eitthvað, kannski – kannski ekki, óttalega kunnugleg en samt ekki. Hreyfa samt ekkert sérstaklega við fólki en því finnst það samt allt í lagi þó þau ögri kannski ekki tónlistarvitun þess. Fínt að hafa þetta í eyrunum á meðan fólk er að gera eitthvað annað.

Í ár sakna ég í tónlist meiri frumleika, meiri dirfsku, meiri krafts og jafnvel smá greddu. Það er líka tilfinnanlegur skortur á ríkari laglínum. Það er eins og það sé einhver hræðsla í gangi við að semja grípandi laglínur í dag, eins og tónlistarmenn verði stimplaðir einhverskonar “sellout” ef þeir skyldu nú slysast til að búa til lag sem fólki langar til að syngja með.

Kannski er ég líka bara orðinn of gamall til að skilja hvað er í gangi. Hver veit?

En hvað um það, hér eru bestu plötur ársins að mínu mati:

5 bestu íslensku plöturnar

1. Brot – Svavar Knútur

Svavar sleppir hér aðeins af sér beislinu og keyrir upp tempóið en þó án þess að það sé á kostnað einlægninnar og tilfinningaseminnar sem einkennt hefur tónlist hans. Lögin sveifla manni til og frá í tónlistarlegum ólgusjó sem hæfir yrkisefnum Svavars fullkomlega. Glæsileg og einstaklega vel unnin plata sem á fyrsta sætið fullkomlega skilið.

2. The Truth, the Love, the Life – Markús & The Diversion Sessions
3. Snapshots – Tonik Ensemble
4. Few More Days to Go – Fufanu
5. Ólundardýr – Rúnar Þórisson

5 bestu erlendu plöturnar

1. Vamala – Champs

Ég fer ekkert leynt með aðdáun mín á þeim Champion bræðrum sem skipa dúóið Champs. Fyrir mér hefur ljúfsár popptónlist sjaldan hljómað eins vel og hjá þeim. Ljúfar harmóníur, grípandi laglínur, beinskeyttar lagasmíðar og brothættur söngur gerir þessa aðra plötu sveitarinnar að bestu erlendu plötunni þetta árið.

2. Carrie & Lowell – Sufjan Stevens
3. Multi-Love – Unknown Mortal Orchestra
4. Paper Mâché Dream Balloon – King Gizzard And The Lizard Wizard
5. Thank You for Stickin’ with Twig – Slim Twig

Bestu lög ársins

Þó mér hafi fundist tónlistarárið frekar lítilfjörlega þá bárust mér nú til eyrna mörg góð lög. Hér að neðan mun ég birta þau allra áheyrilegustu, bæði íslensk og erlend, í engri sérstakri röð, fyrir utan að þau tvö fyrstu sem mér fannst bera af.

Unknown Mortal Orchestra – Multi-Love

Svavar Knútur – Slow Dance

Magnús Leifur – Stormur

José González – Leaf Off / The Cave

Django Django – First Light

Árstíðir – Friðþægingin

Champs – Vamala

BlackRivers – The Ship

Panic is Perfect – Bobby Black

Hjaltalín – We Will Live For Ages

Að sjálfsögðu eru lögin hér að ofan ekki tæmandi listi yfir áheyrilegustu lög ársins að mínu mati. Því til sönnunar færi ég ykkur hér hundrað og tveggja laga samantekt sem undirritaður dundaði sér við að púsla saman á árinu. Njótið vel.

Hverju ætlar Rjóminn svo að hlusta eftir á komandi tónlistarári íslensku?

Rjóminn ætlar að hlusta eftir hjónunum Ívari Páli Jónssyni og Ásdísi Rósu Þórðardóttur sem skipa sveitina Jane Telephonda. Ívar er kannski þekktastur fyrir að hafa samið konseptplötuna Revolution in the Elbow of Ragnar Agnarsson Furniture Painter, sem var tilnefnd til Íslensku tónlistarverðlaunanna árið 2014.

Einnig verður spennandi að heyra meira frá Magnúsi Leif (áður kenndur við Úlpu) en plata ætti að vera væntanleg frá honum á nýju ári. Einnig verður spennandi að heyra meira frá listamönnum á borð við Soffíu Björg, Unni Söru Eldjárn, Júníus Meyvant, Auður (Auðunn Lúthersson), hljómsveitinni FURA, sem leidd er af söngkonunni og lagahöfundinum Björt Sigfinnsdóttur og hljómsveitinni RIF en heyra má báðar síðastnefndu sveitirnar hér að neðan.

Útidúr leggur um þessar mundir lokahönd á nýja plötu í fullri lengd sem er von á mjög bráðlega. Hljómsveitin gefur nú út nýtt lag af komandi plötu en það heitir “Morbid Pleasure (train part II)”.

Sveitin byrjaði að vinna í plötunni fyrir um þremur árum síðan og ætti því að vera spennandi að heyra útkomuna, en margt hefur breyst á þessum tíma. Lagið var tekið upp með Kára Einarssyni (Oyama) og hljóðblandað af honum og sveitinni. Lagið fjallar um sveigjanleika tímans og hvað skal, ef komast á áfram og aftur án þess að tennurnar brotni ekki af stressi.