• facebook
  • soundcloud
  • twitter
  • youtube
  • mail

Rjómatónleikar

  • Birt: 30/01/2006
  • Höfundur:
  • Skoðanir: 0

Rjómatónleikar

1. febrúar á Gauk á Stöng

Rjóminn kynnir til sögunnar nýjan menningarviðburð
Rjómatónleikar

Hvar: Gaukur á Stöng
Hvenær: 1. febrúar, kl. 21:00
Kostar: 500 krónur

Við hér á Rjómanum látum okkur það ekki nægja að horfa/hlusta á og dæma heldur ætlum við okkur nú einnig að leggja okkar af mörkunum til tónlistarmenningarinnar og kynnum því til sögunnar Rjómatónleikana. Ætlum við okkur að halda reglulega styrktartónleika sem hver og einn mun hafa sitt eigið góðgerðarmálefni og veita tónelskandi Íslendingum færi á að gefa um leið og þeir þiggja. Við ríðum á vaðið á morgun, þann 1. febrúar á Gauk á Stöng og munu hljómsveitirnar Úlpa, Ég og Pan stíga á stokk. Í þetta sinn mun Mæðrastyrksnefnd hljóta allan ágóða enda stórgóð samtök þar á ferð. Húsið opnar kl. 21:00 og kostar 500 krónur inn.

Úlpa gaf nýverið út sína aðra breiðskífu Attempted Flight by Winged Men og hefur heillað landan svo um munar síðan sveitin kom fram á sjónarsviðið í byrjun aldarinnar. Vakti frumburðurinn Mea Culpa mikla athygli gagnrýnenda sem og almennings og var tilnefnd til íslensku tónlistarverðlaunanna árið 2001.

Hljómsveitin Ég vakti athygli á síðasta ári með plötu sinni Plata Ársins en hún sportaði ekki aðeins stóru nafni á umslaginu heldur einnig á bakhliðinni því platan er gefin út af gullkálfinum Eið Smára Guðjohnsen. Drengirnir segjast spila vinsældapopp og eru þekktir fyrir að gera hlutina á sinn eigin hátt en það skilaði þeim tilnefningu til íslensku tónlistarverðlaunanna fyrir bestu rokk/jaðarplötu ársins 2005.

Pan er melódísk rokksveit sem hefur rólega verið að byggja sér upp orðstýr síðan hún var stofnuð fyrir fimm árum. Sveitin gaf frá sér frumburð sinn Virgins í fyrra sem hlaut náð fyrir augum gagnrýnenda og titlaði Reykjavik Grapevine þá sem arftaka Mínus í íslensku rokki.

Leave a Reply