• facebook
  • soundcloud
  • twitter
  • youtube
  • mail

Snow Patrol – Eyes Open

  • Birt: 18/05/2006
  • Höfundur:
  • Skoðanir: 8

Snow Patrol - Eyes Open
Einkunn: 2.5
Utgafuar: 2006
Label: A&M

Snow Patrol flytur popp. Uppskrúfaðir tónlistarnördar eiga alls ekki að fíla Snow Patrol.

Snow Patrol flytur popp. Sumir kalla það vinsældapopp. Ef þú ert með ofnæmi fyrir slíku þá er þessi plata klárlega ekki fyrir þig. Jón og Gunna, þessi gæti hljómað heima hjá ykkur.

Uppskrúfaðir tónlistarnördar eiga alls ekki að fíla Snow Patrol. Í útþvældum og útpældum kjallarakompum í gamla daga í blokk í Breiðholti þá var hlustað á eitthvað svona í einrúmi. Það mátti varla minnnast á eitthvað sem var ekki töff. Ef það komu gestir mátt alls ekki heyrast neitt í líkingu við Snow Patrol. Strákarnir hlógu að mér þegar ég sagðist fíla Kúla Sjeiker. Er ekki allt í lagi að hlusta á svona í dag? Smá falsetta og allt!

Það er kvöð að vera töff, á mörkunum, hlustandi á nýjasta nýtt. Vera að reyna að breiða út fagnaðarerindið. Reyna að ala upp óharðnaða unglinga. Er ekki tími á að vaxa upp úr þessari vitleysu og hætta að gefa litlum frænkum Sufjan Stevens í jólagjöf. Sufjan hver? Þær vilja miklu frekar Nælon. Já eða Snow Patrol kannski? Þeir neimdroppa Sufjan Stevens nú í titillagi plötunnar og það ætti að vera nóg fyrir nördana.

Put Sufjan Stevens on, and we’ll play your favorite song

Snow Patrol eru örugglega helvíti hvekktir út í Coldplay. Hljómsveitin er stofnuð tveimur árum á undan Coldplay, hefur gefið út fjölda ágætra platna (til dæmis Songs For Polar Bears) hljómar svipað en hefur aldrei náð sömu hæðum og þeir félagarnir. Gary Lightbody er þó mega poppstjarna í Skotlandi og mikill smellasmiður. Þeir er alltaf nefndir í post-Coldplay samhengi og öllum er sama þegar þeir segjast hafa verið þarna löngu fyrir Coldplay. Já sumir eru einfaldlega lukkunnar pamfílar.

Á Eyes Open er fjöldi dæmigerðra sumarsmella. Þar er aðalsmerkið klassísk uppbygging laga, brýr og flott viðlag sem allir geta sungið með. Ég hef ekki hugmynd um hvað textarnir fjalla en raula þá þó reglulega þegar ég er hættur að hlusta. Það má í raun koma með fullt af dæmum. Í lokalaginu „Finish line“ er brot sem ég er ekki viss um að hafa aðra þýðingu en að rýma.

The earth is warm next to my ear
Insects noise is all that I hear
A magic trick makes the world disappear
The skies are dark, they’re dark but they’re clear

Ásamt „titillaginu“ „Hands Open“ er ég hrifnastur af „Chasing cars“ og svo „Set The Fire To The Third Bar“ ljúfsárri ballöðu sem situr í manni í að minnsta kosti fimm mínútur eftir hlustun en þar er Martha Wainwright með í för.

Þetta er ágætis plata skoskra smellasmiða. Hressir strákar sem eru sprækir á tónleikum. Eyes Open er ágætis plata í bílinn á leiðinni í ísbíltúr í Hveragerði. Ég er ekki viss um að hún fari oft í spilarann árið 2010 en kannski einu sinni tvisvar til að minnast haustsins 2006.

8 Athugasemdir

  1. Halldór · 30/08/2006

    Það góða við texta er að maður getur búið sjálfur til tengingarnar. Mér finnst þetta textabrot búa til mjög skemmtilega ímynd af manni sem flýr vandkvæði sín með því að leggjast út í náttúruna og loka augunum. Töfrabragðið er þá að geta lokað á vandamálin og finna “heiðskýra himna” í myrkrinu.

    Svo gæti einhver annar séð eitthvað allt annað úr þessu. Svo hef ég ekki afganginn af textanum til að miða við.

  2. Sævar · 30/08/2006

    ég vill vera sammála hinum björgvin í því að segja að það sé enginn meining í þessu.
    Dáldið brútal gagnrýni en hefur þá rétt á sér

  3. Halldór · 30/08/2006

    Nákvæmlega það sem ég á við. Maður sér það sem maður vill sjá í textum. Stórskemmtilegur kostur við þá.

  4. Hildur Maral · 02/09/2006

    Hey! Það er ekkert að Kula Shaker!

  5. Dídí · 03/09/2006

    Vil bara benda þeim sem eru að fatta Snow Patrol fyrst núna á plötuna Final Straw sem kom út á undan Eyes Open. Að mati mínu er það besta plata þeirra hingað til.

  6. Maisfeld · 06/12/2006

    „Uppskrúfaðir tónlistarnördar eiga alls ekki að fíla Snow Patrol“
    Þarna er höfundur strax búinn að ómerkja plötudóm sinn.
    Hann er með ákveðna fordóma og fyrirfram myndaðar skoðanir sem eru í raun til skammar fyrir vefsíðu sem ætlar að láta taka sig alvarlega.

    En platan er skv. minni skoðun bara nokkuð góð en stendur Final Straw töluvert að baki.

  7. bió · 06/12/2006

    Það er bara ef þú gefur þér að ég líti á mig sem einn þeirra uppskrúfuðu. Hef nú meira að segja séð Snow Patrol læf og haft gaman að enda var það á Final Straw tímanum…

  8. Kári · 09/02/2007

    Ef þú virkilega hefðir pælt í plötunni þá hefðir þú séð hana í réttu ljósi. Platan er í raun saga, á milli karls og konu.

    Í fyrstu lögunum eru þau að rífast, sættast, kynnast betur,

    Í miðjunni er ástin yfirvofandi, þau elska hvort annað meira en allt

    í endann slitnar upp úr sambandinu og það er of mikið fyrir strákinn sem getur ekki lifað án hennar og drepur sig í endann.

    Að mínu mati besta plata 2006, og þeir eru geðsjúkir live!

Leave a Reply