• facebook
  • soundcloud
  • twitter
  • youtube
  • mail

Fréttir Vikunnar

  • Birt: 10/05/2007
  • Höfundur:
  • Skoðanir: 0

Fréttir Vikunnar

Vorblót, Singapore Sling, New Order o.fl.

Fréttir vikunnar í hnotskurn
Hitað upp fyrir Hróarskeldu á Bar 11

Hróarskeldu upphitunarpartý Roskilde-festival.is, Tuborg, Bar 11 og Reykjavík FM 101,5 verður haldið á Bar 11 annað kvöld. Til að skemmta gestum munu hljómsveitirnar Atómstöðin og Johnny and the Rest troða upp og plötusnúðurinn Óli Dóri þeytir skífum en hjá honum munu einungis hljómsveitir sem mæta á hátíðina í sumar fá að óma. Það er vel þess virði að mæta því fyrir utan góða stemmningu þá verða veigar á Hróarskelduverði og miðar fyrir tvo á Hróarskeldu verða gefnir. Húsið opnar kl. 21:00 og er frítt inn.

Miðasala á hátíðina í ár hefur slegið öll met en meira en helmingur miða hafa verið seldir og eru jafnvel líkur á að uppselt verðir fyrir lok maí mánaðar þannig þeir sem hafa hug á að fara en eiga eftir að næla sér í miða þurfa því að hafa hraðan á.

Miðar á Hróaskeldu fást á Miði.is
Heildarlista yfir hljómsveitirnar er hægt að sjá á heimasíðu hátíðarinnar.

Vorblót í Reykjavík

Tónlistarhátíðin Vorblót fer fram í Reykjavík daganna 17.-19. maí. Hátíðinni er ætlað að vera skemmtileg viðbót við tónleikaflóru höfuðborgarinnar og vettvangur fyrir spennandi og skemmtilega tónlist frá öllum heimshornum. Á Vorblótinu í ár er boðið upp á það besta sem er að gerast í heimi djass-, þjóðlaga- og heimstónlistar. Má þar nefna söngfugl Wassoulou tónlistarinnar Oumou Sangaré frá Malí, skosku salsa hljómsveitina Salsa Celtica, Tómas R. Einarsson og Goran Bregovic sem kemur fram á hátíðinni í samvinnu við Listahátíð í Reykjavík ásamt ásamt serbneskum karlakór, búlgörskum söngkonum, strengjasveit og brassbandi, samtals 40 manns sem öll koma fram í Laugardalshöll 19. maí. Miðasala á hófst þann 1. maí í verslunum Skífunnar, BT Akureyri og Egilstöðum og hjá Midi.is.

Singapore Sling og Evil Madness kveðja klakann

Hljómsveitirnar Singapore Sling og Evil Madness munu kveðja klakann á Hressó í kvöld þar sem þær bjóða gestum upp á fría skemmtun af tilefni þess að hljómsveitirnar halda nú í tónleikaferðalag til Evrópu. Meðal landa sem sveitirnar munu heimsækja eru Þýskaland, Frakkland, Austurríki, Tékkland og Ítalía.

Gaukurinn opnar á ný

Skemmtistaðurinn Gaukur á Stöng hefur starfsemi sína að nýju annað kvöld eftir langt hlé. Það eru sólskinssveitirnar Vinir Vors og Blóma og Buff sem munu klippa á borðann og spila fram eftir kvöldi en Buff ætla að slá á létta strengi og vera með kosninga-eurovision grín. Ekki var setið með hendur í skauti á meðan staðurinn var lokaður heldur hefur verið leitast við að gera staðinn vinalegri og að uppfæra hljóðkerfið.

New Order leggur upp laupana

Fregnir af samstarfsslitum hljómsveitarinnar New Order gengur nú manna á milli á veraldarvefnum. Eitthvað eru meðlimir hljómsveitarinnar tvísaga í þessu því bassaleikari sveitarinnar, Peter Hook, heldur því staðfastlega fram að sveitin sé hætt störfum á meðan Trommuleikarinn Stephen Morris hefur ítrekað staðhæft að sveitin sé ennþá virk. Hook lýsti yfir slitum sveitarinnar í viðtali á útvarpsstöðinni XFM í Englandi þar sem hann auglýsti nýja plötu hljómsveitar Satellite Party sem hann er í ásamt Perry Farrel úr Jane’s Addiction. Sagði Hook að Bernard Sumner, söngvari New Order, og hann væru hættir samstarfi sínu og ýjaði að því að slitin væru endanleg í þetta sinn.

Ali G leikur Mercury

Kvikmynd um goðsögnina Freddy Mercury, hinn sáluga söngvara hljómsveitarinnar Queen, er nú í bígerð. Ráðið hefur verið í hlutverk söngvarans og er það enginn annar en Sasha Baron Cohen, oft betur þekktur sem Borat eða Ali G sem mun taka það að sér og var hann valinn fram yfir stórleikarann Johnny Depp sem sóttist einnig eftir hlutverkinu. Cohen er reyndur þegar kemur að því að bera hormottuna sem einkenndi Freddy því útlit Borats var byggt á útliti Mercury.

Des’ree með versta lagatexta allra tíma

Útvarpsstöðin BBC 6 Music tilkynnti nýlega um „sigurvegara“ keppni stöðvarinnar um verstu dægurlagatexta allra tíma. Var það söngkonan Des’ree sem hlaut þann vafasama heiður fyrir textann í laginu „Life“ en brot úr honum er svohljóðandi: „I don’t want to see a ghost/It’s the sight that I fear most/I’d rather have a piece of toast/Watch the evening news“. Aðrir „sigursælir“ var hljómsveitin Snap með lagið „Rythm is a Dancer“ og Razorlight með lagið „Somewhere Else“. Allan listann má finna á síðu útvarpsstöðvarinnar.

 

Ef þú hefur frétt sem þú telur eiga heima á síðum Rjómans sendu þá póst á rjominn[at]rjominn.is

 

Leave a Reply