L.Ung.A
Listahátíð Ungs Fólks á Austurlandi, betur þekkt sem Lunga, verður haldin dagana 13. til 19. júlí n.k. Þetta er í níunda skipti sem Lunga er haldið og hefur hátíðin heldur betur sótt í sig veðrið undanfarin ár.
Fyrir þá sem ekki þekkja til þá fer hátíðin þannig fram að fyrstu fimm dagana er unnið í listasmiðjum og svo tekur við uppskeruhátíð og tveggja daga tónleikaveisla. Öll kvöld vikunnar eru auk þess þéttskipuð skemmtiefni og uppákomum. Smiðjurnar spanna allt frá saumaskap til afró-dans, og má ég til með að nefna hljóðlistasmiðju sem m.a. Curver og DJ Gísli Galdur hafa kennt.
Lesendur Rjómans ættu þó sennilega að vera spenntastir fyrir tónleikum hátíðarinnar sem hafa heldur betur ekki verið dónalegir. Heimsþekktir listamenn á borð við Trentemøller hafa leikið fyrir hátíðargesti sem og minna þekkt íslensk góðgæti; Bang Gang, FM Belfast, Botnleðja, Mínus, o.fl o.fl.
Í ár er dagskráin alíslensk: Kimi-liðar taka yfir á föstudag (Sudden Weather Change, Miri, Reykjavík!, o.fl.) og á laugardag spila B. Sig, Jagúar, Mugison og Gus Gus. Hátíðin er því tilvalið tækifæri til að slíta sig frá heimahögunum og demba sér út á land og sjá þrælfína íslenska músíkanta spila á Seyðisfirði.
Lengi má tala umLunga, en í stað þess langar mig bara að benda áhugasömum á heimsíðu hátíðarinnar fyrir frekari upplýsingar.
Recent Comments