Alþjóðleg kvikmyndahátíð óskar eftir sjálfboðaliðum
Alþjóðleg kvikmyndahátíð í Reykjavík sem haldin verður 17. til 27. september, auglýsir nú í 6. skipti eftir sjálfboðaliðum sem vilja starfa við hátíðina. Sjálfboðaliðar geta verið á öllum aldri og leitast er við að þeir fái verkefni eftir áhugasviði og hæfni. Á heimasíðu hátíðarinnar, www.riff.is er hægt að forvitnast frekar um hátíðina sem og senda inn umsókn. Óskað er eftir fólki til starfa bæði í aðdraganda hátíðar og eins á meðan á henni stendur.
Í fimm ár hafa tugir sjálfboðaliða frá mörgum löndum unnið við Alþjóðlega kvikmyndahátíð í Reykjavík, RIFF, rétt eins og tíðkast á stórum kvikmyndahátíðum úti í heimi. Sjálfboðaliðarnir geta fengið margvísleg verkefni:
- aðstoða við skipulagningu veislna og sérviðburða í borginni, svara spurningum gesta í upplýsingamiðstöð hátíðarinnar eða aðstoða við miðasölu.
- aðstoða ótalmarga alþjóðlega hátíðargesti við að rata um höfuðborgina.
- hjálpa til við venjuleg skrifstofustörf, hafa samband við alþjóðlega kvikmyndaskóla, svara í síma og fleira.
- aðstoða stjörnur úr kvikmyndabransanum að komast á milli staða: til og frá flugvelli og hóteli til dæmis.
- aðstoða við framkvæmd ýmissa hliðarviðburða hátíðarinnar sem eru sérstaklega ætlaðir grunnskóla-, framhaldsskóla- og háskólanemum.
Nánari upplýsingar veitir Hrönn Marinósdóttir, stjórnandi hátíðarinnar í síma 861 7374 eða Greipur Gíslason framleiðandi í síma 898 3263.
Recent Comments