Tónlistarmaðurinn Sin Fang mun senda frá sér sína þriðju plötu þann 1. febrúar næstkomandi og mun hún heita Flowers. Platan er tekin upp og framleidd í samstarfi við Alex Somers, en hann hefur áður framleitt músík með Jónsa, Sigur Rós, Úlfi, Pascal Pinon og fleirum.
Sin Fang er einmenningsverkefni Sindra Más Sigfússonar og varð til í fríum og pásum hljómsveitarinnar Seabear, sem Sindri einmitt stofnaði á sínum tíma. Sin Fang hefur áður gefið út breiðskífurnar Clangour og Summer Echoes og stuttskífuna Half Dreams sem kom út á síðasta ári.
