Aanonymous Band : nýtt íslenskt-sænskt-franskt framtak

Aanonymous

Hljómsveitin Aanonymous Band gaf nýverið frá sér plötuna Feelings. Sveitin var stofnuð 2013 og er þetta frumurður bandsins, sem eins og nafnið ber með sér, fer undir nafnaleynd.

Feelings er, eins og meðlmir sveitarinnar orða það sjálfir “…næstum því óþægilega hreinskilin plata um þunglyndi, angurð og fegurð lífsins. Platan er tekinn upp og mixuð með það í hugarfari að halda dínamíkinni og leyfa hlustandanum að upplifa nærveru hljómsveitarinnar.”

Aanonymous Band er partur af nýstofnuðum fjöllistahópi sem gengur undir nafninu Aanonymous Aart. Aanonymous hópurinn er og verður óskilgreindur hópur sem byrjaði með einfaldri hugmynd: að svala sköpunargáfunni með því að gera það sem þeim dettur í hug.

Myndverk (video) sköpuð af Ingimar Waage er hluti af framtakinu Aanonymous Aart, tvö verk eru nú þegar birt á heimasíðu Aanonymous. Ef að listamenn vilja leggja sitt af mörkum þá eru þeir hvattir til að hafa samband við Aanonymous (aanonymous@aanonymous.se). Hjálp við að hljóðsetja/klippa verður í boði og þeir sem leggja sitt af mörkum geta valið að taka þátt undir nafnleynd eða eigin nafni.

Plötunni er dreyft í tveimur útgáfum: “48/24 master edition” (Bandkamp) og 44/16 (Cdbaby, Itunes, Amazon o.s.frv.)

Rjóminn gerir upp tónlistarárið 2015

Ég verð að vera hreinskilinn með að ekki fannst mér þetta tónlistarár sérlega merkilegt, hvort sem litið er til útgáfu hér heima eða erlendis. Þessu eru eflaust margir ósammála og tek ég hverskonar umræðu málefnalegri fagnandi, langi einhverjum þá á annað borð að sýna gömlum indíhundi eins og mér að ég hafi rangt fyrir mér. Tónlistarsmekkur fólks, sérstaklega þess sem reglulega treður marvaðann í stríðum tónlistarstraumum og stefnum, er einstaklega persónulegur og því oft erfitt að ræða hann án þess að tilfinningar ráði ferðinni. Ég er líka tilfinningavera mikil og á að til með að missa mig aðeins þegar tónlist og tónlistarumræða er annars vegar. Eins og ég er kannski að gera hér.

En hvað um það.

Ég leita mikið eftir tilfinningum í tónlist og þær kann oft að vanta þó ástríðan sé vissulega fyrir hendi. Í ár fannst mér skorta tilfinningar í tónlist, svona almennt séð. Það er eins og of margir tónlistarmenn séu að reyna að vera eitthvað annað en þeir eru, reyna að fanga einhverja ímynd sem hæfir þeim ekki, reyna að líkjast einhverjum öðrum eða þá að forðast samlíkingu við aðra. Á endanum fer þetta allt að renna saman í eitt og hljóma eins og eitthvað miðmoð, einhverskonar tónlistarleg málamyndun, sem fólk er hvorki með eða á móti. Lög taka að hljóma eins og eitthvað, kannski – kannski ekki, óttalega kunnugleg en samt ekki. Hreyfa samt ekkert sérstaklega við fólki en því finnst það samt allt í lagi þó þau ögri kannski ekki tónlistarvitun þess. Fínt að hafa þetta í eyrunum á meðan fólk er að gera eitthvað annað.

Í ár sakna ég í tónlist meiri frumleika, meiri dirfsku, meiri krafts og jafnvel smá greddu. Það er líka tilfinnanlegur skortur á ríkari laglínum. Það er eins og það sé einhver hræðsla í gangi við að semja grípandi laglínur í dag, eins og tónlistarmenn verði stimplaðir einhverskonar “sellout” ef þeir skyldu nú slysast til að búa til lag sem fólki langar til að syngja með.

Kannski er ég líka bara orðinn of gamall til að skilja hvað er í gangi. Hver veit?

En hvað um það, hér eru bestu plötur ársins að mínu mati:

5 bestu íslensku plöturnar

 Svavar Knútur - Brot

1. Brot – Svavar Knútur

Svavar sleppir hér aðeins af sér beislinu og keyrir upp tempóið en þó án þess að það sé á kostnað einlægninnar og tilfinningaseminnar sem einkennt hefur tónlist hans. Lögin sveifla manni til og frá í tónlistarlegum ólgusjó sem hæfir yrkisefnum Svavars fullkomlega. Glæsileg og einstaklega vel unnin plata sem á fyrsta sætið fullkomlega skilið.

2. The Truth, the Love, the Life – Markús & The Diversion Sessions
3. Snapshots – Tonik Ensemble
4. Few More Days to Go – Fufanu
5. Ólundardýr – Rúnar Þórisson

5 bestu erlendu plöturnar

Champs - Vamala

1. Vamala – Champs

Ég fer ekkert leynt með aðdáun mín á þeim Champion bræðrum sem skipa dúóið Champs. Fyrir mér hefur ljúfsár popptónlist sjaldan hljómað eins vel og hjá þeim. Ljúfar harmóníur, grípandi laglínur, beinskeyttar lagasmíðar og brothættur söngur gerir þessa aðra plötu sveitarinnar að bestu erlendu plötunni þetta árið.

2. Carrie & Lowell – Sufjan Stevens
3. Multi-Love – Unknown Mortal Orchestra
4. Paper Mâché Dream Balloon – King Gizzard And The Lizard Wizard
5. Thank You for Stickin’ with Twig – Slim Twig

Bestu lög ársins

Þó mér hafi fundist tónlistarárið frekar lítilfjörlega þá bárust mér nú til eyrna mörg góð lög. Hér að neðan mun ég birta þau allra áheyrilegustu, bæði íslensk og erlend, í engri sérstakri röð, fyrir utan að þau tvö fyrstu sem mér fannst bera af.

Unknown Mortal Orchestra – Multi-Love

Svavar Knútur – Slow Dance

Magnús Leifur – Stormur

José González – Leaf Off / The Cave

Django Django – First Light

Árstíðir – Friðþægingin

Champs – Vamala

BlackRivers – The Ship

Panic is Perfect – Bobby Black

Hjaltalín – We Will Live For Ages

Að sjálfsögðu eru lögin hér að ofan ekki tæmandi listi yfir áheyrilegustu lög ársins að mínu mati. Því til sönnunar færi ég ykkur hér hundrað og tveggja laga samantekt sem undirritaður dundaði sér við að púsla saman á árinu. Njótið vel.

Hverju ætlar Rjóminn svo að hlusta eftir á komandi tónlistarári íslensku?

Rjóminn ætlar að hlusta eftir hjónunum Ívari Páli Jónssyni og Ásdísi Rósu Þórðardóttur sem skipa sveitina Jane Telephonda. Ívar er kannski þekktastur fyrir að hafa samið konseptplötuna Revolution in the Elbow of Ragnar Agnarsson Furniture Painter, sem var tilnefnd til Íslensku tónlistarverðlaunanna árið 2014.

Einnig verður spennandi að heyra meira frá Magnúsi Leif (áður kenndur við Úlpu) en plata ætti að vera væntanleg frá honum á nýju ári. Einnig verður spennandi að heyra meira frá listamönnum á borð við Soffíu Björg, Unni Söru Eldjárn, Júníus Meyvant, Auður (Auðunn Lúthersson), hljómsveitinni FURA, sem leidd er af söngkonunni og lagahöfundinum Björt Sigfinnsdóttur og hljómsveitinni RIF en heyra má báðar síðastnefndu sveitirnar hér að neðan.

Útidúr gefur út nýtt lag. Plata á leiðinni!

Útidúr

Útidúr leggur um þessar mundir lokahönd á nýja plötu í fullri lengd sem er von á mjög bráðlega. Hljómsveitin gefur nú út nýtt lag af komandi plötu en það heitir “Morbid Pleasure (train part II)”.

Sveitin byrjaði að vinna í plötunni fyrir um þremur árum síðan og ætti því að vera spennandi að heyra útkomuna, en margt hefur breyst á þessum tíma. Lagið var tekið upp með Kára Einarssyni (Oyama) og hljóðblandað af honum og sveitinni. Lagið fjallar um sveigjanleika tímans og hvað skal, ef komast á áfram og aftur án þess að tennurnar brotni ekki af stressi.

Markús & The Diversion Sessions halda tónleika á Kex Hostel

Markús & The Diversion Sessions

Markús & The Diversion Sessions blása til tónleika í Gym & Tonic á KEX Hostel næstkomandi föstudagskvöld, 18. desember klukkan 21:00. Hljómsveitin mun spila flest lögin af nýútkominni plötu sinni, The Truth The Love The Life, ásamt fleiri eldri og nýrri laga.

Sveitin leggst í hýði á nýju ári þar til útgáfutónleikar verða haldnir í mars/apríl. Þetta er því einstakt tækifæri til þess að hlýða á tónleika af stærri gerðinni með sveitinni. Gestaspilarar verða með og ætla að skreyta lögin með lúðrablæstri , slagverki og bakröddum. Sveitin kíkti í stúdíó nýverið og vann í nýjum lögum. Þau verða til flutningar á tónleikunum ásamt öllum hinum og tökulagi í anda árstíðarinnar.

Markús & the Diversion Sessions skipa þeir Ási Þórðarson, Georg Kári Hilmarsson, Markús Bjarnason og Marteinn Sindri Jónsson.

Húsið opnar kl. 20:30 og byrja tónleikarnir stundvíslega kl. 21:00.

Forsala miða er á Tix.is og er verð í forsölu 1000 krónur, verð á miðum við hurð er 1500 krónur.

Sister Sister Gefur frá sér nýtt lag og myndband

Hljómsveitin Sister Sister sem skipuð er systrunum Audrey Freyju og Helgu Margréti Clarke hefur verið að vinna í nýjum lögum síðustu mánuði og er nú að gefa út nýtt lag og myndband.

Lagið heitir “Home Again” og unnu þær systur lagið í sameiningu við Togga Nolem sem m.a. hefur verið í hljómsveitinni Mafama og unnið með hljómsveitum á borð við Skytturnar, Cell 7 og Kött Grá Pjé.

Audrey Freyja var einn af þátttakendum í The Voice nú í haust og vakti þónokkra athygli, m.a. eftir einvígi sitt við söngkonuna Guðrúnu Árnýju.

Lag og texti er saminn af Audrey Freyju, Toggi Nolem sá um hljóðblöndun og vinnslu á laginu og Anra Films gerði myndbandið.

Teitur Magnússon með nýtt myndband

Nýtt tónlistarmyndband við lagið “Kamelgult” eftir Teit Magnússon af plötunni 27 hefur litið dagsins ljós.

Myndbandinu er leikstýrt af Sigurði Möller Sívertsen og var tekið upp í Sarajevó í Bosníu og Hersegóvínu þar sem Sigurður stundar nám við leikstjórn undir handleiðslu Béla Tarr. Myndbandið var skotið á 16mm filmu sem var svo framkölluð inni á klósetti seinna um kvöldið. Sigurður er jafnframt trommari rokksveitarinnar Grísalappalísu og hlaut Íslensku tónlistarverðlaunin árið 2013 fyrir besta tónlistarmyndbandið við lagið “Hver er ég?”.

FURA

Hljómsveitin FURA, sem leidd er af söngkonunni og lagahöfundinum Björt Sigfinnsdóttur, var að gefa út sína aðra plötu. Platan, sem samnefnd er sveitinni, er nú aðgengileg á streymisveitunni Spotify.

Björt samdi tónlistina á plötunni en Hallur Jónsson og Janus Rasmussen pródúseruðu plötuna.

Trylltur Himbrimi laus í næstu plötubúð!

Út er komin plata með dramatísku popphljómsveitinni Himbrima og þegar hafa komið út lögin “Highway” og “Tearing” notið töluverðar útvarpsspilunar. Nýjasta smáskífa sveitarinna heitir “Give me more” og er einnig komið í spilun á útvarpsbylgjum landsins.

Himbrimi

Platan, sem er samnefnd hljómsveitinni, er komin út á geisladisk og á netinu. Í desember mun síðan koma glæsileg vínilútgáfa og mun sjálfur vínillinn vera rauður til að minna á rauð augu Himbrimans.

Sveitin var tilnefnd sem nýliðar ársins á Hlustendaverðlaununum 2015 og einnig fékk Margrét, söngkona sveitarinnar, tilnefningu sem söngkona ársins.

Himbrimi eru:
Margrét Rúnarsdóttir – söngur & píanó
Birkir Rafn Gíslasson – gítar
Hálfdán Árnasson – bassi
Egill Örn Rafnsson – trommur
Skúli Arason – hljóðgerflar

Platan var hljóðblönduð af Sveini Jónssyni í Great Eastern hljóðverinu og hljómjöfnuð af 360 Mastering. Hönnuðurinn Ómar Örn Hauksson sá um útlitshönnun.

Jane Telephonda – Transmuted Saltness

Hljómsveitin Jane Telephonda hefur sent frá sér myndband við lagið “Transmuted Saltness”. Í myndbandinu fer leikstjórinn Friðrik Þór Friðriksson á kostum, en hann er þekktari fyrir að vera á bak við myndavélina.

Jane Telephonda skipa hjónin Ívar Páll Jónsson og Ásdís Rósa Þórðardóttir, en Ívar er kannski þekktastur fyrir að hafa samið konseptplötuna Revolution in the Elbow of Ragnar Agnarsson Furniture Painter, sem var tilnefnd til Íslensku tónlistarverðlaunanna árið 2014. Leikgerð plötunnar var sýnd í New York á síðasta ári.

“Transmuted Saltness” kemur út á stafrænu formi, á iTunes, Spotify og öðrum tónlistarveitum 27. nóvember, hjá indie-útgáfufyrirtækinu Mother West í New York. Einnig verður hægt að kaupa lagið beint af hljómsveitinni á www.janetelephonda.com.

Bangoura Band – Asante

Bangoura Band er 9 manna hljómsveit sem hefur verið starfrækt síðan í ársbyrjun 2013. Hún spilar afríska tónlist og er stofnandi hljómsveitarinnar frá Guineu í vestur afríku. Meðfylgjandi er myndband við fyrstu smáskífuna af væntanlegri fyrstu plötu hljómsveitarinnar sem ætti að sjást í hillum verslana nú rétt fyrir jól.

Hljómsveitina skipa:

Albert Sölvi Óskarsson – Baritone saxophone
Atli Þór Kristinsson – Guitar
Baba Bangoura – Congas
Cheick Ahmed Tidiane Bangoura – Bongo / Shekere
Elvar Bragi Kristjónsson – Trumpet
Pétur Daníel Pétursson – Drums
Sindri Magnússon – Bass
Sólveig Morávek – Tenor saxophone
Valbjörn Snær Lilliendahl – Guitar

Stafrænn Hákon – Eternal Horse

Stafrænn Hákon - Eternal Horse

Eternal Horse er níunda breiðskífa sveimrokkssveitarinnar Stafrænn Hákon. Á þessari 9 laga plötu skiptir hljómsveitin um gír og kannar kunnuglegar slóðir sem greina mátti á plötunni þeirra Sanitas frá árinu 2010.

Síðustu tvær plötur sveitarinnar voru vissulega skref í sitthvora áttina þar sem tvær ólíkar stefnur voru kannaðar. Á Eternal Horse má heyra 7 sungin poppskotin ásamt 2 instrumental lögum. Platan sækir í hljóðheim sem er hljómsveitinni vel kunnugur af fyrri verkum, þar sem flæðandi og bjagaðir gítarveggir eru í fyrirrúmi ásamt fallegum akústískum útfærslum ásamt melódískum söng. Magnús Freyr Gíslason er sem fyrr í fyrirrúmi með sína silkimjúku rödd og hinn hollenski Minco Eggersman ljáir sína djúpu rödd í 3 lög.

Eternal Horse er fyrsta plata Stafræns Hákons þar sem hljómsveitin sér um allan hljóðfæraleik og því eiginlega fyrsta “hljómsveitarplata” sveitarinnar. Sveitin er nú skipuð Ólafi Erni Josephssyni gítarleikara, Lárusi Sigurðssyni gítarleikara, Árna Þór Árnasyni bassaleikara, Róberti Má Runólssyni tommuleikara og Magnúsi Frey Gíslasyni söngvara. Einnig leggur Samuel White til á plötunni sem fyrr í tveimur lögum, en hann hefur verið Stafrænum innan handar frá því á annari plötu sveitarinnar Í Ástandi Rjúpunnar.

Platan var tekin upp í Vogor Studios 2011-2015 og var framleidd af Ólafi Erni Josephssyni. Um hljóðjöfnun sáu Daniel Lovegrove og Finnur Hákonarson. Plötuumslag og listaverk var hannað af Árna Þór Árnasyni. Það er Ameríska útgáfan Darla Records sem gefur plötuna út og dreifir.

All Day, Everyday

All Day, Everyday

All Day, Everyday er sóló verkefni Dags Árna Guðmundssonar sem er búsettur í San Luis Obispo í Kaliforníu. A Very Sad Album er önnur platan sem kemur út undir þessu nafni og önnur platan sem kemur út í ár. Lög plötunar eru fjölbreytt en á þeim má greina áhrif frá rokki, elektroník og poppi.

Rúnar Þórisson gefur út sína fjórðu plötu

Rúnar Þórisson - Ólundardýr

Rúnar Þórisson gefur nú út sinn fjórða sólódisk sem ber heitið Ólundardýr. Að baki gerð disksins lá ákveðin hugmynd og hvati. þ.e. að gefa út eitt lag á mánuði á veraldarvefnum frá janúar til nóvember 2015 að afraksturinn er allur gefinn út. Útgáfudagur var 7. nóvember en þann dag hefði faðir Rúnars, Þórir Sæmundsson orðið áttræður og er diskurinn helgaður minningu hans. Þannig liggur hugsunin um uppruna, arfleifð og þakklæti fyrir lífsgjöf að baki ferlinu.

Með Rúnari spila m.a. Arnar Þór Gíslason á trommur, Birkir Rafn Gíslason á gítar, Guðni Finnsson á bassa, Lára Rúnarsdóttir og Margrét Rúnarsdóttir radda og syngja. Lög og textar eru eftir Rúnar auk þess sem er að finna eitt lag eftir föður hans við ljóð eftir Davíð Stefánsson. Útgefandi er Rúnar sjálfur en KONGÓ sér um dreifingu og Red River Records (Synthadelia Records) sér um rafræna dreifingu á netinu.

Gillon – Glaður í sól

Gillon

Út er komið nýtt lag með Gillon sem nefnist “Glaður í sól”. Lagið er af væntanlegri plötu sem kemur út í byrjun næsta árs. Upptökur fóru fram í Stúdíó Benmen á Sauðárkróki og var upptökustjórn í höndum Sigfúsar Arnars Benediktssonar.

Á bakvið flytjandanafnið Gillon er Gísli Þór Ólafsson en hann hefur áður gefið út 3 plötur.

Karl Hallgrímsson – Draumur um koss

Karl Hallgrímsson - Draumur um koss

Út er komin hljómplatan Draumur um koss. Á plötunni eru 10 ný lög og 9 nýir textar eftir Karl Hallgrímsson (eitt lagið er án texta). Draumur um koss er önnur sólóplata Karls, en hann gaf út plötuna Héðan í frá árið 2011. Karl stýrði sjálfur upptökum á plötunni í félagi við Birgir Baldursson en Birgir hljóðblandaði einnig.

Tónlistin á plötunni er fjölbreytt og erfitt getur verið að setja hana á ákveðinn bás tónlistarstefnanna eins og gjarnan er gert. Þarna er blús, djass, popp, rokk, vísnatónlist, klezmer-vals og fönk. Útsetningarnar eru lifandi og hljóðfæraleikurinn stórgóður, enda valinn maður í hverju rúmi. Tónlistarfólk í fremstu röð í rokki, blús, djassi og klassík leikur með Karli á plötunni.

Auður

Auðunn Lúthersson er 22 ára tónlistarmaður sem kemur fram undir nafninu Auður. Hann var nýlega tekinn inn í RBMA (Hudson Mohawke, Aloe Blacc, Katy B og Evian Christ) af yfir 4500 umsækjendum. Að undanförnu hefur hann verið á bakvið tjöldin við lagasmiðar hjá einhverjum helstu nöfnum í íslensku hip-hoppi og poppi. Þar á meðal lagið “Strákarnir” með Emmsjé Gauta. Auk þess var hann í framhaldsnámi FÍH í djassgítarleik. Hann frumsýndi nýverið myndbandið við lagið “South America” sem hann leikstýrði sjálfur með Árna Beinteini.

Himbrimi tekst á loft

Himbrimi

Þriðja smáskífulagið, “Give me more”, af vætanlegri plötu Himbrima er nú komið út. Um er að ræða fyrstu opinberu plötuútgáfu Himbrima sem þó hefur verið iðin við kolann frá stofnun hljómsveitarinnar í fyrra.

Þegar hafa komið út lögin “Highway” og “Tearing” sem bæði hafa notið töluverðar útvarpsspilunar. Afurðin er nú farin í framleiðslu og er vætanleg í allar helstu plötubúðir um miðjan nóvember.

Platan, sem er samnefnd hljómsveitinni, mun útkoma út í glæsilegri rauðri vínilútgáfu og einnig á hefbundnari geisladisk. Um hljóðblöndun sá Sveinn Jónsson í Great Eastern hljóðverinu og hljómjöfnuð af 360 mastering er einnig staðsett í London.

Sem stendur er verið að safna fyrir útgáfunni á Karolina Fund þar er hægt að tryggja sér eintak og ef heldur sem fram horfir mun söfnunin takast.

“Back & Back Again” komið út á heimsvísu

Tónlistarkonan Soffía Björg sendi fyrir stuttu frá sér lagið “Back & Back Again” sem er nú farið á hljóma á öldum ljósvakans á Íslandi auk þess sem eftirtektarvert myndband við lagið er komið á netið.

Nú er lagið komið út á heimsvísu í stafrænu formi á öllum helstu efnisveitum einsog; Spotify, iTunes, Amazon, Google Play, Deezer, eMusic og Rhapsody svo einhvurjar séu nefndar.