Tónlistarmaðurinn og ljóðskáldið Gísli Þór Ólafsson

Gillon

Gísli Þór Ólafsson er merkilegur listamaður. Í vor kom út 4. sólóplata Gísla Þórs sem nefnist Gillon og er nefnd eftir flytjandanafni hans. Á plötunni eru 8 lög eftir Gísla og á hann sex af textunum, en tveir af þeim eru ljóð eftir Ingunni Snædal úr ljóðabók hennar Komin til að vera, nóttin (2009).

Platan var tekin upp í Stúdíó Benmen á Sauðárkróki og var upptökustjórn í höndum Sigfúsar Arnars Benediktssonar, félaga Gísla í hljómsveitinni Contalgen Funeral. Sigfús hefur stjórnað upptökum á öllum hljómplötum Gísla.

Í tilefni af 10 ára útgáfuafmæli Gísla Þórs og útgáfu bókarinnar Safnljóð 2006-2016 hefur verið opnuð síðan á karolinafund.com til að styðja við útgáfuna. Í boði er árituð bók og einnig allar bækurnar áritaðar. Auk þess eru allar bækurnar og allir diskarnir í boði á einstöku tilboði, allt áritað, eða 10 titlar á aðeins 13.000 kr.

Markús & The Diversion Sessions halda tónleika á Kex Hostel

Markús & The Diversion Sessions

Markús & The Diversion Sessions blása til tónleika í Gym & Tonic á KEX Hostel næstkomandi föstudagskvöld, 18. desember klukkan 21:00. Hljómsveitin mun spila flest lögin af nýútkominni plötu sinni, The Truth The Love The Life, ásamt fleiri eldri og nýrri laga.

Sveitin leggst í hýði á nýju ári þar til útgáfutónleikar verða haldnir í mars/apríl. Þetta er því einstakt tækifæri til þess að hlýða á tónleika af stærri gerðinni með sveitinni. Gestaspilarar verða með og ætla að skreyta lögin með lúðrablæstri , slagverki og bakröddum. Sveitin kíkti í stúdíó nýverið og vann í nýjum lögum. Þau verða til flutningar á tónleikunum ásamt öllum hinum og tökulagi í anda árstíðarinnar.

Markús & the Diversion Sessions skipa þeir Ási Þórðarson, Georg Kári Hilmarsson, Markús Bjarnason og Marteinn Sindri Jónsson.

Húsið opnar kl. 20:30 og byrja tónleikarnir stundvíslega kl. 21:00.

Forsala miða er á Tix.is og er verð í forsölu 1000 krónur, verð á miðum við hurð er 1500 krónur.

Karl Hallgrímsson – Draumur um koss

Karl Hallgrímsson - Draumur um koss

Út er komin hljómplatan Draumur um koss. Á plötunni eru 10 ný lög og 9 nýir textar eftir Karl Hallgrímsson (eitt lagið er án texta). Draumur um koss er önnur sólóplata Karls, en hann gaf út plötuna Héðan í frá árið 2011. Karl stýrði sjálfur upptökum á plötunni í félagi við Birgir Baldursson en Birgir hljóðblandaði einnig.

Tónlistin á plötunni er fjölbreytt og erfitt getur verið að setja hana á ákveðinn bás tónlistarstefnanna eins og gjarnan er gert. Þarna er blús, djass, popp, rokk, vísnatónlist, klezmer-vals og fönk. Útsetningarnar eru lifandi og hljóðfæraleikurinn stórgóður, enda valinn maður í hverju rúmi. Tónlistarfólk í fremstu röð í rokki, blús, djassi og klassík leikur með Karli á plötunni.

Tónlistarkonan Bláskjár gefur út nýtt lag – 17. aldar trip hop folk bræðingur

Bláskjár

Tónlistarkonan Bláskjár sendi frá sér nýja smáskífu þann 24. júlí síðastliðinn. Lagið heitir “Silkirein” og er önnur smáskífa af væntanlegri stuttskífu tónlistarkonunnar sem kemur út í haust. Lagið er dáleiðandi blanda af íslenskri 17. aldar ljóðlist og folk skotnu triphoppi, með rafmögnuðum hljóðheim. Lagið er samið við ljóð Stefáns Ólafssonar, Raunakvæði, sem samið var á 17. öld.

Upptökustjórn er í höndum Einars Stefánssonar, sem hefur unnið mikið með Reykjavíkurdætrum og hljómsveitinni Vök og er lagið tekið upp í stúdíói hans en píanóupptökur fóru fram hjá Danna Pollock í Tónaslóð, þar sem notast var við yfir 100 ára gamlan flygil til að gefa laginu fornt yfirbragð.

Tónlistarkonan hlaut nýverið styrk frá Tónskáldasjóði Rásar 2 til að fjármagna upptökur á væntanlegri stuttskífu og fyrr í sumar var Bláskjár valin í 10 hljómsveita úrslit af Rás 2, í Unsigned Talent Competition á vegum ATP Iceland hátíðarinnar. Myndband við lagið er í bígerð og kemur út í ágúst.

Júníus Meyvant – EP

Júníus Meyvant – EP

Vestmannaeyingurinn Unnar Gísli Sigurmundsson stimplaði sig rækilega inn á íslenska tónlistarlandakortið þegar hann gaf út smáskífuna „Color Decay“ vorið 2014. Unnar Gísla þekkja margir landsmenn undir listamannsnafninu Júníus Meyvant. Það er óhætt að segja að þegar Júníus steig fram á sjónarsviðið hafi hann komið til vits og ára og augljóst að tónlist hans hafi fengið að dafna og þroskast í langan tíma.

Nú hefur Júníus Meyvant lokið við vinnslu sinnar fyrstu þröngskífu og kallast hún einfaldlega EP. Þröngskífuna vann hann víða með upptökumönnunum Magnúsi Øder Kristinssyni og Finni Hákonarsyni. Auk „Color Decay“ inniheldur EP þrjú önnur lög, þ.m.t. nýjustu smáskífuna „Hailslide“.

Árið 2014 var gott ár fyrir Júníus Meyvant. „Color Decay“ naut mikilla vinsælda meðal hlustenda Rásar 2 og sömuleiðis var lagið valið lag ársins af dagskrárstjóra KEXP, Kevin Cole. Júníus kom, sá og sigraði á Íslensku tónlistarverðlaununum í ár og fór frá athöfninni með tvenn verðlaun. Annars vegar sem Bjartasta vonin og hinsvegar verðlaun fyrir besta lag ársins.

Record Records gefur út og er þröngskífan fáanleg á geisladisk, vínyl og á stafrænum netveitum. Útgáfudagur er föstudagurinn 17. Júlí.

I Told You – Rebekka Sif

“I Told You” er grípandi lag eftir söngkonuna Rebekku Sif en hún er ungur og efnilegur lagasmiður úr Garðabænum. Hún og hljómsveitin hennar hefur verið öflug að spila frá því í síðasta haust þegar hún skellti í sjö off-venue gigg á Iceland Airwaves. Hljómsveitina skipa Aron Andri Magnússon á gítar, Sindri Snær Thorlacius á bassa og Helgi Þorleiksson á trommur. “I Told You” var tekið upp af Arnóri Sigurðarsyni, sem sá einnig um hljóðblöndun.

Textamyndbandið var framleitt af PRÆM TÆM, ungu myndbandateymi frá Garðabæ sem vinna þetta sumarið í Skapandi sumarstarfi þar sem Rebekka Sif starfar einnig.

Rebekka skrifaði lagið í týpísku ömurlegu íslensku sumarveðri þegar hana vantaði eitthvað til að létta sér lund. Hún vonar að lagið geti gert slíkt hið sama fyrir aðra sólarþyrsta íslendinga.

Helgi Valur gefur út Notes From The Underground

Tónlistarmaðurinn Helgi Valur gaf út fjórðu plötu sína Notes From The Underground þann 13. maí síðastliðinn. Titillag plötunnar er samið í Berlín og markar endalok erfiðs tímabils sem einkenndist af óreglu og geðsjúkdómum. Flest lög plötunnar eru samin á áfangaheimili en lokalag plötunnar var samið í fyrstu innlögn inn á geðdeild.

Notes from The Underground er mikilvæg heimild tilfinningalífs sprottið af undirheimunum. Helgi Valur heldur útgáfutónleika á Húrra 27.maí og kemur fram með ógrynni hæfileikaríkra tónlistarmanna. Má þar nefna Ása Þórðarson úr Muck, Úlf Alexander úr Oyama, Berg Anderson úr Grísalappalísu og Katie Buckley úr Sinfó.

Nýtt lag í spilun frá Red Barnett

Red Barnett. Mummi Lú 2015

Lagið “My Island” er nýtt lag í spilun frá Red Barnett, en nú er rétt rúmur mánuður síðan frumsmíð hans, SHINE, kom út. Lagið er kannski það pólitískasta á plötunni; fjallar um hversu skrýtið það er að við fáum lítið sem ekkert um það að segja þegar ráðamenn afsala þjóðareign til fárra útvaldra – og á vel við í ljósi nýjustu frétta. Í laginu leika Hannes Heimir Friðbjarnarson á trommur, Kjartan “Diddi” Guðnason á slagverk og Kristín Lárusdóttir á selló ásamt Haraldi “Red Barnett” Sveinbjörssyni.

Hljómsveitin Hinemoa sendir frá sér nýtt lag

Hinemoa

Hinemoa er íslensk hljómsveit sem stofnuð snemma á síðasta ári. Skilgreinir sveitin sig sem einskonar órafmagnaða indie/folk/pop hljómsveit sem byggir á röddum og sterkum rythma.

Hljómsveitin gaf út sitt fyrsta lag “Í Rökkurró” seint á síðasta ári og hefur nú gefið út sitt annað lag, “Running Amongst The Stars” og verða þau bæði á fyrstu breiðskífu hljómsveitarinnar sem unnið er nú að.

Í Hinemoa eru: Ásta Björg Björgvinsdóttir (gítar, ukulele and söngur), Rakel Pálsdóttir (gítar og söngur), Sindri Magnússon (Bassi), Gísli Páll Karlsson (slagverk og söngur) og Kristófer Nökkvi Sigurðsson (slagverk).

Hljómsveitin Kriki sendir frá sér sína fyrstu smáskífu

Hljómsveitin Kriki gaf út sitt fyrsta lag nýverið. Heitir það “Svefn” og fjallar um samband svefns og tilfinningalegs ástands. Katrín Helga Andrésdóttir er forsprakki sveitarinnar en hún er þegar í tveimur öðrum starfandi hljómsveitum, Reykjavíkurdætrum og Hljómsveitt, en Kriki er, samkvæmt Katrínu, ákveðið andsvar við því sem hún gerir með þeim sveitum:

Ef við getum sagt að Hljómsveitt fjalli um kynlíf, þá fjallar kriki um ástina. Reykjavíkurdætur og Hljómsveitt snúast um pönkað attitude og að vera sama hvað öllum finnst, en Kriki er persónulegra og meira berskjaldandi kannski. Gegnumgangadi þema í textunum er höfnun og sjálfsvorkun.

Freyr Flodgren með sólóverkefni

Freyr Flodgren

Freyr Flodgren í Brother North, sem Rjóminn hefur fjallað um áður, vinnur nú að sólóplötu. Hingað til vinnur hann efnið fyrir rödd og klassískan gítar en svo á að bætast við kontrabassi og slagverk. Freyr hefur þegar tekið upp nokkur lög “læf í stúdíóinu” en svo er planið að fara í endanlegar upptökur með haustinu.

Fyrsta lagið var tekið upp á myndband en það heitir ”Over My Head”.

Freyr tók upp annað lag á SAE Institute í London en það heitir ”What are We?”.

Árstíðir gefa út sína þriðju plötu

Árstíðir - Hvel

Í dag, föstudaginn 6. mars, gefur hljómsveitin Árstíðir út sína þriðju breiðskífu. Platan hefur hlotið nafnið Hvel og hefur hennar verið beðið með nokkurri eftirvæntingu, allt frá því hljómsveitin tilkynnti síðasta vor að efnt yrði til söfnunar í gegnum heimasíðuna Kickstarter til að fjármagna útgáfuna.

Markmiðinu var náð á einungis nokkrum dögum og áður en yfir lauk höfðu yfir 1500 manns lagt hljómsveitinni lið með fjárframlögum gegn loforði um að fá ýmsan varning sendan heim að dyrum. Auk plötunnar sjálfrar var t.a.m boðið uppá sérsniðnar íslenskar lopapeysur og ösku úr Eyjafjallajökli, svo dæmi séu tekin.

Það má segja að hljómur Árstíða hafi þróast og tekið ýmsum breytingum frá því síðasta plata, Svefns og vöku skil var gefin út árið 2011. Mannabreytingar hafa orðið á sveitinni í millitíðinni og ber nýji hljómurinn þess merki. Meðlimir hafa því að nokkru leyti fetað nýjar slóðir á nýju plötunni og gætir nú rafrænna áhrifa meira en á fyrri breiðskífum, auk þess sem trommuásláttur setur sinn svip á nokkur lög plötunnar.

Portraits of the Icelandic band Árstí?ir taken on-location at Toppstö?in power station in Reykjavík, Iceland. March 26, 2014.

Platan Hvel var samin og tekin upp að hluta til í gömlu rafstöðinni í Elliðaárdal, þar sem hljómsveitin hefur haft æfingaraðstöðu síðustu tvö árin. Upptökustjóri plötunnar er Styrmir Hauksson sem meðal annars hefur unnið með GusGus, Ásgeiri Trausta, Bloodgroup og Retro Stefson. Hljóðjöfnun annaðist Glenn Schick, en sá hefur hefur unnið með stórum listamönnum á borð við Elton John, Jutin Bieber og Skid Row.

Síðustu ár hefur hljómsveitin verið á ferð og flugi erlendis og spilað á tónleikum í meira en 30 löndum. Ekkert er lát á ferðalögum því í vor mun hljómsveitin fylgja Hvel á eftir með þremur tónleikaferðalögum um Þýskaland, Austurríki og Bretland, og í sumar er fyrirhugað sex vikna tónleikaferðalag um Bandaríkin.

Hljómsveitin gefur sjálf út og dreifir plötunni rafrænt, en er einnig með plötusamning við Þýska útgáfufyrirtækið Beste Unterhaltung sem gefur út plötur sveitarinnar í Bretlandi, Þýskalandi, Austurríki og Sviss.

Hvel er þriðja hljóðversplata Árstíða í fullri lengd, en áður hafa komið út plöturnar Árstíðir (2009), Svefns og vöku skil (2011) og Ep-platan Tvíend (2012) sem inniheldur endurhljóðblandanir (remix) af lögum sveitarinnar.

Tónleikar í kvöld, 6 Mars

Formlegir útgáfutónleikar verða síðan haldnir þegar nær dregur vori. En til að fagna útgáfunni mun hljómsveitin halda tónleika á Café Rósenberg í kvöld (föstudagskvöld), en segja má að hljómsveitin hafi byrjað feril sinn með tónleikahaldi þar. Tónleikarnir hefjast kl. 22:00 og verður nýja platan í boði á sérstöku tilboðsverði.

Reykjavík Folk Festival hefst í kvöld á Kex Hostel

Reykjavik Folk Festival

Í fréttatilkynningu segir:

Þjóðlagatónlistarhátíðin Reykjavík Folk Festival verður haldin í fimmta sinn á Kex Hostel við Skúlagötu dagana 5.- 7. mars 2015. Dagskrá hátíðarinnar er ætlað að blanda saman þjóðlagatónlistarmönnum og -hljómsveitum á ólíkum aldri og frá ólíkum áttum innan þjóðlagatónlistarheimsins. Hátíðin fer fram í notalegum húsakynnum Kex Hostels og verður ekkert til sparað við að skapa notalega og einlæga stemmningu og ógleymalega tónlistarveislu fyrir alla unnendur þjóðlagatónlistar.

Þeir listamenn sem koma fram á hátíðinni í ár eru; Teitur Magnússon, Ylja, Kólga, Funi, Moð, Lindy Vopnfjord (CA), Klassart, Lay Low, JP Hoe (CA), Björn Thoroddsen, Pétur Ben og Egill Ólafsson.

Fyrir hátíðina 2015 viljum við varpa ljósi á þjóðlagatónlistarhefð Kanada með hliðsjón af tengingu Íslands við Kanada og reyna að efla tengsl á milli þessara þjóða í gegnum þjóðlagatónlistarhefðina. Við bjóðum því tveimur kanadískum listamönnum frá Winnipeg sem eiga ættir að rekja til Íslands, þá Lindy Vopnfjörð og JP Hoe velkomna á hátíðina.

Miðaverð á hátíðina er 3.000 kr fyrir stök kvöld en 7.999 kr fyrir passa sem gildir á öll 3 kvöldin. Dagskrá hátíðarinnar hefst kl. 20 öll kvöl og líkur kl. 23:30.

Miðasala fer fram á Tix.is

Streymið nýjustu plötu Árstíða fram að útgáfudegi 6.mars

Rjóminn og hljómsveitin Árstíðir bjóða lesendum Rjómans að streyma nýjustu plötu sveitarinnar, Hvel, fram að útgáfudegi hennar þann 6. mars næstkomandi.

Hljómsveitin Árstíðir sem hóf að spila saman fyrir rétt rúmum sjö árum. Hún hefur starfað mikið erlendis og hefur komið sér upp dyggum aðdáendahóp í löndum eins og Þýskalandi og Rússlandi.

Hvel er þriðja hljóðsversplata Árstíða í fullri lengd en áður hafa komið út plöturnar Árstíðir (2009), Svefns og vöku skil (2011) og Ep-platan Tvíend (2012) sem inniheldur endurhljóðblandanir (remix) af lögum sveitarinnar.

Hljómurinn á Hvel hefur þróast talsvert frá fyrri plötum. Meira ber á rafrænum áhrifum, alls kyns effektum og hljóðgerflum. Platan var saminn og að miklu leiti tekin upp í gömlu rafstöðin í Elliðárdal þar sem hljómsveitin hefur æfingaraðstöðu.

Portraits of the Icelandic band Árstí?ir taken on-location at Toppstö?in power station in Reykjavík, Iceland. March 26, 2014.

Ljósmynd : Matt Eisman

Upptökustjóri var Styrmir Hauksson sem hefur meðal annars unnið með GusGus, Ásgeiri Trausta, Bloodgroup og Retro Stefson. Bandaríkjamaðurinn Glenn Schick gerði masteringuna en sá hefur hefur masterað ógreni af rap-plötum sem og plötur eftir Elton John, Skid Row og Justin Bieber svo eitthvað sé nefnt.

Hljómsveitin gefur sjálf út og dreifir plötunni rafrænt, en er einnig með samning við Þýska útgáfufyrirtækið Beste Unterhaltung sem sér um að gefa út plötum sveitarinnar í Bretlandi, Þýskalandi, Austurríki og Swiss.

Upptaka og framleiðsla plötunnar var með öllu fjármögnuð i gegnum síðuna Kickstarter. Stór hluti þeirra sem studdu verkefnið búa í Bandaríkjunum og í kjölfarið hefur hljómsveitin skipulagt tónleikaferðalag um Bandaríkin um næsta sumar.

Þegar hafa þrjár smáskífur heyrsts af Hvel, meðal annars lagið “You Again” en hljómsveitin bjó til myndband við lagið uppá Langjökli í samstarfi við listakonuna Kitty Von-Sometime.

Í vor mun hljómsveitin fyljga Hvel eftir með þremur tónleikaferðalögum um Þýskaland, Austurríki og Bretland.

Rebekka Sif – Dusty Wind

Rebekka Sif

Rebekka Sif er 22 ára söngkona og lagasmiður úr Garðabænum sem nýverið sendi frá sér lagið “Dusty Wind”, blúsað rokk/popp lag þar sem rödd hennar fær að njóta sín í hæstu hæðum. Hljómsveit hennar samanstendur af þremur hæfileikaríkum piltum, Aroni Andra Magnússyni, Sindra Snæ Thorlacius og Helga Þorleikssyni. Arnór Sigurðarson sá um upptökustjórn og Bjarni Bragi Kjartansson masteraði.

Síðasta sumar gaf Rebekka út lagið “Our Love Turns to Leave” sem fékk góðar móttökur, en það tók hún upp sjálf í gegnum Skapandi sumarstörf í Garðabæ. Í augnablikinu stundar hún nám í jazz- og rokksöng í Tónlistarskóla FÍH, bókmenntafræði í HÍ, ásamt því að kenna söng í Sönglist og Klifinu.

Soffía Björg sendir frá sér sína fyrstu smáskífu

Soffía Björg

Tónlistarkonan Soffía Björg hefur sent frá sér fyrsta lagið af komandi breiðskífu sinni.

Lagið er titillag plötunnar en hún er væntanleg nú á vormánuðum. Soffía Björg og hljómsveit hennar hafa verið iðin undanfarið ár við að spila á ýmsum festivölum og tónleikum (Reykjavik Folk Festival, Aldrei fór ég suður, Rauðasandur o.fl) og stönda nú í ströngu leggja lokahönd á plötuna.

Rjóminn fylgist spenntur með framvindu mála.

Ýlfur eftir Gísla Þór Ólafsson komin út

Ýlfur eftir Gísla Þór Ólafsson

Út er komin platan Ýlfur. Platan er þriðja sólóplata Gísla Þórs Ólafssonar, en hann hefur áður gefið út plöturnar Bláar raddir (lög við ljóð Geirlaugs Magnússonar, 2013) og Næturgárun (undir flytjandanafninu Gillon, 2012). Platan, sem inniheldur tíu lög, er byggð á samnefndri kassettu sem höfundur gaf út í örfáum eintökum árið 1998.

Upptökur fóru fram í Stúdíó Benmen og var upptökustjórn í höndum Sigfúsar Arnars Benediktssonar. Mynd á umslagi gerði Auður Eyleif Einarsdóttir.

Þess má til gamans geta að Gísli Þór er einnig bassaleikari hljómsveitarinna Contalgen Funeral.

Meðfylgjandi eru lögin “Blá blóm” og “Andar í ýlfrun trjánna”.

Ólafur Björn sendir frá sér plötuna Innhverfi

Óbó

Innhverfi er fyrsta hljómplata Ólafs Björn Ólafssonar sem kallar sig Óbó. Á plötunni má heyra sjö lög með íslenskum textum í flutningi Ólafs ásamt einvala liði hljóðfæraleikara. Þó að Innhverfi sé fyrsta hljómplata Ólafs þar sem heyra má hann syngja eigin lög hefur hann á undanförnum árum komið fram sem slagverksleikari og hljómborðsleikari með mörgum af vinsælustu hljómsveitum og listamönnum þjóðarinnar og má þar nefna Sigur Rós, Jónsa og Emilíönu Torrini.

Innhverfi er gefin út af þýsku hljómplötuútgáfunni Morr Music á heimsvísu og er bæði fáanleg á geisladisk og vínil. Ólafur mun fylgja eftir útgáfunni með tónleikaferðalagi um Evrópu eftir áramót þar sem hann mun koma fram ásamt Sóley á stuttum evróputúr.