Júníus Meyvant – EP

Júníus Meyvant – EP

Vestmannaeyingurinn Unnar Gísli Sigurmundsson stimplaði sig rækilega inn á íslenska tónlistarlandakortið þegar hann gaf út smáskífuna „Color Decay“ vorið 2014. Unnar Gísla þekkja margir landsmenn undir listamannsnafninu Júníus Meyvant. Það er óhætt að segja að þegar Júníus steig fram á sjónarsviðið hafi hann komið til vits og ára og augljóst að tónlist hans hafi fengið að dafna og þroskast í langan tíma.

Nú hefur Júníus Meyvant lokið við vinnslu sinnar fyrstu þröngskífu og kallast hún einfaldlega EP. Þröngskífuna vann hann víða með upptökumönnunum Magnúsi Øder Kristinssyni og Finni Hákonarsyni. Auk „Color Decay“ inniheldur EP þrjú önnur lög, þ.m.t. nýjustu smáskífuna „Hailslide“.

Árið 2014 var gott ár fyrir Júníus Meyvant. „Color Decay“ naut mikilla vinsælda meðal hlustenda Rásar 2 og sömuleiðis var lagið valið lag ársins af dagskrárstjóra KEXP, Kevin Cole. Júníus kom, sá og sigraði á Íslensku tónlistarverðlaununum í ár og fór frá athöfninni með tvenn verðlaun. Annars vegar sem Bjartasta vonin og hinsvegar verðlaun fyrir besta lag ársins.

Record Records gefur út og er þröngskífan fáanleg á geisladisk, vínyl og á stafrænum netveitum. Útgáfudagur er föstudagurinn 17. Júlí.

Skarkali tríó

Skarkali

Tríóið Skarkali var stofnað sumarið 2013. Áður hafa liðsmenn spilað saman í mörgum hópum við hin ýmsu tilefni eftir að hafa kynnst í Tónlistarskóla FÍH. Þaðan hafa þeir allir útskrifast á síðustu árum.

Skarkali flytur frumsamda jazztónlist eftir píanóleikarann Inga Bjarna Skúlason þar sem fjölbreytnin er höfð í fyrirrúmi. Fágaður bassaleikur Valdimars Olgeirssonar og kraftmikill trommuleikur Óskars Kjartanssonar setja tónlistina á hærra plan.

Skarkali tríó hefur gefið út sína fyrstu plötu og heitir hún einfaldlega Skarkali. Platan er nú fáanleg í helstu plötubúðum landsins. Á disknum eru níu frumsamin lög í fjölbreyttum jazz útsetningum. Upptökur á disknum fóru fram í Amsterdam í febrúar síðastliðnum þar sem tveir meðlima tríósins stunda tónlistarnám í Hollandi.

Haldnir verða glæsilegir útgáfutónleikar í Hannesarholti, Reykjavík þann 16. júlí. Á tónleikunum verða að sjálfsögðu öll lög plötunnar flutt. Að flutningi loknum gefst tónleikagestum kostur á að kaupa plötuna á sérstöku tónleikaverði.

Mosi Musik sendir frá sér I Am You Are REMIX

I Am You Are REMIX

Hljómsveitinn Mosi Musik, sem nýverið gaf út sýna fyrstu plötu sem bar nafnið I Am You Are Me, hefur nú sent frá sér eftirfylgju sem ber nafnið I Am You Are Remix. Eins og nafnið gefur til kynna eru þetta remix af laginu “I am you are me (feat. Krúz)” þar sem nokkrir valinkunnir listamenn spreyta sig á laginu en þeir eru Orang Volante, Lewis Copeland & SW9. SW9 komst í 7. sæti á PartyZone listanum í Maí með sitt remix en SW9 eru þeir Tommi White og Grétar G. (Sean Danke).

Hljómsveitin VALD gefur út sína fyrstu stuttskífu

Vald

Hljómsveitin VALD gaf út sína fyrstu stuttskífu þann 9. júlí síðastliðinn en þá var nákvæmlega ár liðið síðan sveitin hélt sína fyrstu tónleika á Húrra.

VALD er skipuð raftónlistarmanninum Ástvaldi Axel Þórissyni og píanóleikaranum og söngvaranum Þorvaldi Sigurbirni Helgasyni en þeir hafa starfað saman í mörg ár í mismunandi verkefnum og voru t.d. meðlimir í hljómsveitinni Draumhvörf.

Platan, sem er samnefnd sveitinni, er 6 laga EP plata sem hefur að geyma tónlist sem þeir Ástvaldur og Þorvaldur sömdu og tóku upp á eigin spýtur auk þess sem saxófónleikarinn Birkir Blær Ingólfsson spilaði inn á nokkur lög.

Tónlist VALD mætti lýsa sem bræðingi af þungri raftónlist og melankólískum djassi og telur hljómsveitin meðal áhrifavalda sinna listamenn allt frá Erik Satie til Jon Hopkins.

Umgjörð plötunnar var hönnuð af myndlistarmanninum Hjálmari Guðmundssyni en hægt verður að streyma plötunni frítt á vefsíðu hljómsveitarinnar ásamt myndbandi við lagið “Rökkurdjásn” sem myndlistarmaðurinn Þröstur Valgarðsson gerði fyrir hljómsveitina. Platan verður einnig fáanleg til sölu og hlustunar á öðrum tónlistarveitum svo sem Spotify og Bandcamp.

Trúboðarnir

Trúboðarnir - Óskalög sjúklinga

Í fréttatilkynningu segir:

Trúboðarnir voru aldrei stofnaðir heldur fengu meðlimir köllun frá æðri máttar- völdum um að nú skyldu þeir setja saman hljómsveit. Ekki ólíkt því þegar Betlehemsstjarnan leiddi vitringana þrjá í átt að fjárhúsinu forðum. Og þannig er það bara, það er köllun að vera í Trúboðunum en ekki val.

 Til að taka af allan vafa þá hefur trúboð Trúboðana ekkert með trúmál í hefbundinni skilgreiningu þess orðs að gera. Trúboðstrúboðið snýst um að berjast gegn stöðnun, almennum leiðindum og miðaldrakrísum hverskonar. Eins konar forvörn fyrir að verða ekki golfinu að bráð eða ganga í Oddfellow, Frímúrarana eða önnur álíka félög.

Trúboðarnir

Trúbræðurnir eru fjórir:

 Kalli Örvars, – Zýkkklarnir, Stuðkompaníið, Eldfuglinn ofl. 
Heiðar Ingi – HAMS, Rokkvinir, Tolstoy ofl.
 Gummi Jóns – Hörmung, Janus, Kikk, Tíbet Tabú, Zebra, Sálin ofl.
 Maggi Magg – Hún andar, Exit, Útópía ofl.

Hjá Trúboðunum hefur tilveran hingað til verið tímlaus og hver dagur ,,er sem þúsund ár og þúsund ár dagur ei meir” eins og segir í þjóðsöngi vorum. En núna er komin út geisladiskur frá hljómsveitinni, Óskalög sjúklinga, með tíu frumsömdum lögum sem mun meitla nafn Trúboðanna í fyrsta skipti í tímatal íslenskrar tónlistarsögu. Diskurinn er tekin upp fyrr á þessu ári í Stúdíó Paradís af Ásmundi Jóhannssyni sem hljóðblandaði einnig.

Óskalög sjúklinga nefnist verkið og er ætlað að létta þjáðri þjóð lund. Hér eru borin á borð ný óskalög sem allt eins gætu hljómað eins oft á öldum ljósvakans og “Lítill drengur”. Lögin á plötunni eru eftir Kalla og Heiðar sem einnig semja texta auk þess sem Gísli Einarsson, Edduverðlaunahafi og Hallgrímur Helgason handhafi Íslensku bókmenntaverðlaunanna ljá hljómsveitinni sinn textan hvorn. Óttarr Proppé, alþingismaður og HAMari er svo gestasöngvari í laginu “Vantrúboð”.

Rúnar Þórisson sendir frá sér sitt sjötta lag í verkefninu “Eitt lag á mánuði”

Lagið skref er 6. lag í verkefni Rúnars Þórissonar tónlistarmanns sem hann kallar “Eitt lag á mánuði” og hófst í janúar síðastliðnum. Hálft ár er því síðan verkefnið hófst en því líkur með heildarútgáfu í nóvember þegar faðir Rúnars hefði orðið áttræður.

Lögin sem áður hafa komið út eru:

Rís upp

Í 1000 ár, daga og nætur

Orð

Hver er þar?

Ólundardýr

I Told You – Rebekka Sif

“I Told You” er grípandi lag eftir söngkonuna Rebekku Sif en hún er ungur og efnilegur lagasmiður úr Garðabænum. Hún og hljómsveitin hennar hefur verið öflug að spila frá því í síðasta haust þegar hún skellti í sjö off-venue gigg á Iceland Airwaves. Hljómsveitina skipa Aron Andri Magnússon á gítar, Sindri Snær Thorlacius á bassa og Helgi Þorleiksson á trommur. “I Told You” var tekið upp af Arnóri Sigurðarsyni, sem sá einnig um hljóðblöndun.

Textamyndbandið var framleitt af PRÆM TÆM, ungu myndbandateymi frá Garðabæ sem vinna þetta sumarið í Skapandi sumarstarfi þar sem Rebekka Sif starfar einnig.

Rebekka skrifaði lagið í týpísku ömurlegu íslensku sumarveðri þegar hana vantaði eitthvað til að létta sér lund. Hún vonar að lagið geti gert slíkt hið sama fyrir aðra sólarþyrsta íslendinga.

Sappanwood – Around

Tónlistar tvíeykið Sappanwood hefur að geyma þá Elvar Braga Kristjónsson og Val Zophoníasson. Tónlistarsamband þeirra nær frá árinu 2005 en Sappanwood er þó nýskriðið úr ofninum.

Sameiginlegur þorsti í melankólíu og sjálfsskoðun varð til þess að Elvar og Valur ákvaðu að stofna Sappanwood sumarið 2014 eftir að hafa reynt fyrir sér á öðrum hliðum poppsins.

Áður hafa þeir starfað saman í hljómsveitinni Ferju og Elvar Bragi hefur að baki litríkan tónlistarferil og blæs til að mynda trompet í afróbeat hljómsveitinni Bangoura Band.

Sappanwood hefur lokið upptöku á sinni fyrstu hljómplötu sem nefnist Reverse en meðfylgjandi lag “Around” er einmitt að finna á henni. Platan kemur út síðla þessa árs.

Langþráð önnur breiðskífa Of Monsters and Men er komin út

Of Monsters and Men - Beneath the skin

Í fréttatilkynningu segir:

Of Monsters and Men gefur í gær út sína aðra breiðskífu, Beneath The Skin, á Íslandi.

Íslensk útgáfa breiðskífunnar inniheldur lögin „Backyard“ og „Winter Sound“ sem er ekki að finna á hefðbundinni útgáfu breiðskífunnar erlendis heldur eingöngu á viðhafnarútgáfum og á þeirri íslensku.

Hljómsveitin hefur eytt síðastliðnu ári á Íslandi og í Los Angeles með upptökustjóranum Rich Costey sem vann með þeim að breiðskífunni en hann hefur unnið með hljómsveitum á borð við Muse, Death Cab for Cutie, Foster The People og Interpol.

Hljómsveitin er um þessar mundir á tónleikaferðalagi og spilar meðal annars tvenna uppselda tónleika í Eldborgarsal Hörpu í ágúst.

Það má búast við miklu af sveitinni á næstunni og er óhætt að segja að margt hafi gerst síðan fyrsta breiðskífa þeirra kom út á Íslandi árið 2011 en hún hefur selst í tveim milljónum eintaka á heimsvísu.

2 nýjar útgáfur hjá Möller Records

Möller Records gefur út tvær “Helgur” nýverið; smáskífuna Lovin Life með Bistro Boy og söngvaranum Anthony Jackson og stutt-plötuna Mindscapes með listamanninum Andartak.

Plöturnar verða fáanlegar á vefsvæði Möller Records : www.mollerrecords.com

Bistro Boy er listamannsnafn Frosta Jónssonar sem hefur gefið út 3 plötur á vegum Möller Records – síðast Rivers & Poems í samstarfi við japanska hljóðlistamanninn Nobuto Suda. Lovin’ Life var tekin upp í vetur í samstarfi við söngvarann Anthony Jackson og fóru upptökur fram í heimaveri Frosta í Sólheimum. Smáskífan inniheldur einnig endurgerðir eftir Snooze Infinity, Modesart og Mr. Signout.

 

Andartak er listamannsnafn Arnórs Kára og er Mindscapes fyrsta platan hans. Arnór Kári er götulistamálari og hefur skreytt Reykjavík og heimili landsins um árabil – en núna fáum við hann til að skreyta fyrir okkur umhverfið í tónum. Mindscapes var tekin upp “live” með KORG græjunum Volca Bass, Volca Beats, Volca Keys, MS-20 Mini og Kaoss Pad.

Lára Rúnars gefur út Þel

Lára Rúnars - ÞelSíðast liðið ár hefur Lára Rúnars unnið að plötu í samstarfi við Stefán Örn Gunnlaugsson. Platan sem er draumkennd og ævintýraleg hefur fengið titilinn Þel og kom hún út nú í vikunni. Ólíkt fyrri plötum Láru þá er Þel öll samin og sungin á Íslensku. Þrjú laganna af plötunni hafa þegar komið út og ratað ofarlega á vinsældarlistum landsins.

Útgáfutónleikar í Fríkirkjunni 4.júní

Útgáfutónleikar plötunnar verða haldnir í Fríkirkjunni þann 4. júní og á Græna Hattinum Akureyri þann 5. júní. Lára Rúnars verður á tónleikaferðalagi um landið í sumar þar sem hún kynnir nýjustu plötuna sína ásamt því að spila annað gamalt og gott.

Hljómsveit Láru Rúnars skipa:

Arnar Þór Gíslason á trommur, Birkir Rafn Gíslason á gítar
, Guðni Finnsson á bassa, 
Þorbjörn Sigurðsson á hljómborð
, Rósa Guðrún Sveinsdóttir og Valdimar Guðmundsson blástur og söngur. Margrét Rúnarsdóttir, Rakel Pálsdóttir, Guðrún Ragna Yngvadóttir og Ásta Björg í bakröddum.

Record Records gefur út This Is Icelandic Indie Music vol. 3

This Is Icelandic Indie Music Vol. 3
Í fréttatilkynningu segir:

Safnplötuserían This Is Icelandic Indie Music hefur notið mikillar hylli meðal innlendra og erlendra tónlistarunnenda síðastliðin tvö ár og er nú komið að útgáfu þeirrar þriðju. This Is Icelandic Indie Music Vol. 3 kemur í verslanir á geisladiski og á netveitur í dag, 29. maí. Vínillinn lendir svo um miðjan. júní.

This Is Icelandic Indie Music Vol. 3 inniheldur tólf lög með jafnmörgum flytjendum og af þeim eru fimm lög sem eru áður óútgefin. Einnig eru að finna fjögur lög tónlistarmanna sem ekki gefa út hjá Record Records og eru það hinn ungi Húsvíkingur Axel Flóvent, hljómsveitirnar Hjaltalín og Valdimar og tónlistarmaðurinn Teitur Magnússon. Ný og óútgefin lög eru eftir verðlaunahafann Júníus Meyvant sem gefur út sína fyrstu þröngskífu í sumar, Moses Hightower sem vinna að sinni þriðju breiðskífu og sömuleiðis Agent Fresco sem eru að leggja lokahönd á sína aðra breiðskífu. Vök úr Hafnarfirði gáfu út sína aðra þröngskífu þann 22. maí síðastliðinn og eiga þau nýtt lag á skífunni sem og Hjaltalín sem senda frá sér sitt nýjasta lag.

Lagalistin á This Is Icelandic Indie Music Vol. 3 er svohljóðandi:

  1. Júníus Meyvant – Hailslide
  2. Hjaltalín – We Will Live For Ages
  3. Axel Flóvent – Forest Fires
  4. Máni Orrason – Fed All My Days
  5. Vök – Waterfall
  6. FM Belfast – Holiday
  7. AmabAdamA – Gaia
  8. Moses Hightower – Snefill
  9. Mammút – Þau svæfa
  10. Agent Fresco – See Hell
  11. Teitur Magnússon – Vinur vina minna
  12. Valdimar – Ryðgaður dans

Vök sendir frá sér þröngskífuna Circles

Vök - Circles

Hljómsveitin Vök gefur á morgun, föstudaginn 22. Maí, út sína aðra þröngskífu en hún nefnist Circles.

Sveitin er ný komin heim eftir vel heppnaða ferð á The Great Escape tónlistarhátíðina í Brighton þar sem sveitin hefur hlotið frábæra dóma fyrir tónleika sína. Framundan eru tónleikar í Hörpu þar sem sveitin hitar upp fyrir Ásgeir 16. Júní og þá spilar sveitin á Hróaskelduhátíðinni ásamt fleiri tónlistarhátíðum vítt og breytt um Evrópu.

Vök er skipuð Andra Má Enokssyni, Margrétri Rán Magnúsdóttur og Ólafi Alexander Ólafssyni.

Upptökur og upptökustjórn var í höndum hljómsveitarmeðlima en Biggi Veira, oftast kenndur við GusGus, sá um hljóðblöndun og hljómjöfnun.

Helgi Valur gefur út Notes From The Underground

Tónlistarmaðurinn Helgi Valur gaf út fjórðu plötu sína Notes From The Underground þann 13. maí síðastliðinn. Titillag plötunnar er samið í Berlín og markar endalok erfiðs tímabils sem einkenndist af óreglu og geðsjúkdómum. Flest lög plötunnar eru samin á áfangaheimili en lokalag plötunnar var samið í fyrstu innlögn inn á geðdeild.

Notes from The Underground er mikilvæg heimild tilfinningalífs sprottið af undirheimunum. Helgi Valur heldur útgáfutónleika á Húrra 27.maí og kemur fram með ógrynni hæfileikaríkra tónlistarmanna. Má þar nefna Ása Þórðarson úr Muck, Úlf Alexander úr Oyama, Berg Anderson úr Grísalappalísu og Katie Buckley úr Sinfó.

Nýtt lag í spilun frá Red Barnett

Red Barnett. Mummi Lú 2015

Lagið “My Island” er nýtt lag í spilun frá Red Barnett, en nú er rétt rúmur mánuður síðan frumsmíð hans, SHINE, kom út. Lagið er kannski það pólitískasta á plötunni; fjallar um hversu skrýtið það er að við fáum lítið sem ekkert um það að segja þegar ráðamenn afsala þjóðareign til fárra útvaldra – og á vel við í ljósi nýjustu frétta. Í laginu leika Hannes Heimir Friðbjarnarson á trommur, Kjartan “Diddi” Guðnason á slagverk og Kristín Lárusdóttir á selló ásamt Haraldi “Red Barnett” Sveinbjörssyni.

Ýlfur Gísla Þórs Ólafssonar

Ýlfur eftir Gísla Þór Ólafsson

Í fyrra kom út platan Ýlfur, þriðja sólóplata Gísla Þórs Ólafssonar. Á plötunni, sem er 10 laga, má finna 4 lög við ljóð Geirlaugs Magnússonar (úr bókinni Þrítíð, 1985) og eitt lag við ljóð Gyrðis Elíassonar (úr bókinni Tvö tungl, 1989). Ljóð Geirlaugs komu einnig út á kassettunni Lystisnekkjan Gloría sem Smekkleysa gaf út árið 1986 og las þá skáldið við undirspil Bubba Morthens.

Meðfylgjandi eru lög af Ýlfri, “Blá blóm” og lag við ljóð Geirlaugs, “Fleiri nátta blús”.

Upptökustjórn var í höndum Sigfúsar Arnars Benediktssonar.
Mynd á umslagi gerði Auður Eyleif Einarsdóttir.

Ný plata og tónlistarmyndband frá Mosi Musik

Í fréttatilkynningu segir:

Fyrsta plata Mosi Musik kom út þann 25. apríl og ber hún nafnið I am you are me. Um er að ræða 12 laga plötu sem spannar nokkrar tónlistastefnur. Hljómsveitin er þekkt fyrir fjölbreytileika í sinni músík en oft hefur reynst erfitt að skilgreina tónlist Mosi Musik í einu orði og hefur hún verið kölluð allt frá “Epic power disco” (Chris Sea fyrir Rvk Grapevine) yfir í “The future sound of pop music” (Lewis Copeland) en hljómsveitin kallar sjálf tónlistina “Electro Power Pop Disco”.

Mosi Musik frumsýndi nýtt tónlistarmyndband 18. Maí við lagið “I Am You Are Me” en í laginu rappar hún Krúz með sveitinni.

Jón Teitur Sigmundsson og Hollendingurinn Joost Horrevorst leikstýra myndbandinu en sem framleitt er af Nágranna.