Twee Tími – Seapony
Ég skal játa ég er óskaplega veikur fyrir þessu undarlega fyrirbæri sem kallast Twee Pop á ágætri ensku. Skilgreiningin á orðinu “twee” er í grófum dráttum eitthvað sem er ægilega krúttlegt og sætt. Það er nú einmitt tilfellið í flestum eða öllum þeim lögum sem ég ætla á næstu vikum (eða árum) að draga fram í dagsljósið hér, undir kaflaheitinu “Twee Tími”. Þeir sem fyrirlíta krúttlegt popp geta því hæglega forðast þessa pósta.
Twee er hinsvegar ekki alltaf bara sætt og krúttað, heldur líka röff og pönkað. Hljóðfæraskipan getur verið í meira lagi undarleg og stundum skiptir ekki máli hvað maður getur heldur hvað maður gerir. Mörkin milli Twee og annara tónlistarstefna geta sömuleiðis verið nokkuð óljós, til að mynda eru stefnur sem kallast C-86, Jangle og eitthvað sem virðist vera kallað “Anorak” nátengdar, og alla jafna er þetta allt sett undir regnhlífarhugtakið “Indie Pop”. Sjálfum hugnast mér lítt svona skilgreiningar, ef tónlist hreyfir við manni þá er það gott og blessað sama hvaða nafni hún nefnist.
Eftir ítarlegar rannsóknir hef ég komist að því að margir sem aðhyllast, og spila, svona músík hafa jafnt gaman af The Carpenters, Burt Bacharach og Serge Gainsbourg sem og Ramones og My Bloody Valentine. Oft er því sameinað á skemmtilegan hátt það sem mér finnst sjálfum best í tónlist, grípandi laglínur og rifnir gítarar. Hljómsveitin Seapony frá Seattle minnir hinsvegar um margt á þá eðal sveit Beat Happening. Hún inniheldur Jen og Danny úr Transmittens (sem ég hef aldrei heyrt nefnda heldur) og vin þeirra Ian. Fátt veit ég meira um bandið en hér eru tvö lög sem ég vona þið hafið gaman af.
Þá er komið að því enn eina ferðina að fara á hinn stóra akur Alnetsins og finna nokkur vel valin lög erlendis frá lesendum Rjómans til ánægju og yndisauka. Meðfylgjandi eru sjö afar áheyrileg lög frá jafn mörgum flytjendum. Njótið vel.
Sudden Weather Change ætla að bjóða öllum sem vilja að koma á ótrúlega skemmtilega menningarnæturtónleika í æfingarhúsnæðinu sínu fyrir neðan Tónlistarþróunarmiðstöðina (TÞM) að Hólmaslóð númer tvö úti á Granda. Ætla þeir að spila öll lögin af væntanlegri EP-skífu sem þeir félagar voru að taka upp með Ben Frost.
Pterodactyl er lítið netlabel sem sérhæfir sig útgáfu tölvuleikjatónlistar eða svokallaðrar “chip” tónlistar. Þar á bæ hafa menn tekið sig saman og gefið út, frjálsa til niðurhals, safnplötu til heiðurs nördrokksveitinni Weezer. Útkoman er nokkuð skondin og áhugaverð og verður að segjast að sum lög hljóma jafnvel betur svona heldur en upprunalega.
Þann 21. september næstkomandi mun fyrsta plata Frankie Rose, sem einhverjir kannast eflaust við úr sveitum eins og Crystal Stilts, Dum Dum Girls og Vivian Girls, koma út. Í fréttatilkynningu segir að platan hljómi eins og “…ef Cocteau Twins og Shangri-Las hafi komist yfir tímavél og ákveðið að gefa út plötu saman með Phil Spector sem upptökustjóra”. Miðað við hljóðdæmið hér að neðan þá hljómar það nokkuð nærri lagi.
Byrjum á aðal númerinu. Út er komin ný plata með !!! (Chick-Chick-Chick) og sýnist sitt hverjum um ágæti hennar sem heyrt hafa. Sjálfur hef ég nú ekki heyrt nema nokkur lög og verð að játa mig allt annað en yfir mig hrifinn. Meðfylgjandi lag er þó alveg þolanlegt áheyrnar enda með grípandi takt og töff bassagang.
Nýlegar Athugasemdir