Skarkali tríó

Skarkali

Tríóið Skarkali var stofnað sumarið 2013. Áður hafa liðsmenn spilað saman í mörgum hópum við hin ýmsu tilefni eftir að hafa kynnst í Tónlistarskóla FÍH. Þaðan hafa þeir allir útskrifast á síðustu árum.

Skarkali flytur frumsamda jazztónlist eftir píanóleikarann Inga Bjarna Skúlason þar sem fjölbreytnin er höfð í fyrirrúmi. Fágaður bassaleikur Valdimars Olgeirssonar og kraftmikill trommuleikur Óskars Kjartanssonar setja tónlistina á hærra plan.

Skarkali tríó hefur gefið út sína fyrstu plötu og heitir hún einfaldlega Skarkali. Platan er nú fáanleg í helstu plötubúðum landsins. Á disknum eru níu frumsamin lög í fjölbreyttum jazz útsetningum. Upptökur á disknum fóru fram í Amsterdam í febrúar síðastliðnum þar sem tveir meðlima tríósins stunda tónlistarnám í Hollandi.

Haldnir verða glæsilegir útgáfutónleikar í Hannesarholti, Reykjavík þann 16. júlí. Á tónleikunum verða að sjálfsögðu öll lög plötunnar flutt. Að flutningi loknum gefst tónleikagestum kostur á að kaupa plötuna á sérstöku tónleikaverði.

Hljómsveitin 23/8 og Björkologi

Jazzbandið 23/8 mun ferðast um landið nú í lok mánaðar og spila prógram sem þau kalla Björkologi en það samanstendur af vel völdum lögum úr safni Bjarkar og útsett á jazzvísu. Bandið skipa tvær íslenskar stelpur og tveir útlenskir strákar, öll búsett í Stokkhólmi.

Ljóst er að allir alvöru jazzgeggjarar og aðdáendur Bjarkar hreinlega verða að láta sjá sig ef eitthvað er að marka meðfylgjandi tóndæmi:

Tónleikar 23/8 verða haldnir á eftirfarandi stöðum:

23. júlí kl.21:00 Bryggjan, Grindavík, ókeypis
24. júlí kl.20:00 Norræna Húsið, Reykjavík, 2000 kr.
25. júlí kl.20:00 Norræna Húsið, Reykjavík, 2000 kr.
26. júlí kl.20:00 Stykkishólmskirkja, ókeypis
28. júlí kl.21:00 Græni Hatturinn, Akureyri, 2000 kr.
29. júlí kl.22:00 Gamli Bærinn, Mývatni, ókeypis

Tónleikahátíðin KEXPort verður haldin í fjórða skipti

Agent Fresco

Tónleikahátíðin KEXPort verður haldin í fjórða skiptið í portinu fyrir aftan KEX Hostel laugardaginn 18. júlí næstkomandi frá tólf á hádegi til miðnættis. Tónleikarnir eru haldnir til heiðurs KEXP í Seattle og munu koma fram tólf tónlistaratriði á jafn mörgum klukkustundum. KEXP er útvarpsstöð sem sótt hefur Ísland árlega allt frá árinu 2009 og hefur unnið óeigingjarnt starf til kynningar íslenskrar tónlistar í Bandaríkjunum og víðar í heiminum.

Hátíðin er haldin í portinu fyrir aftan Kex Hostel og eru þeir opnir almenningi á meðan rúm leyfir. Mikill stemmning er fyrir KEXPort í ár og er óhætt að segja að segja að fjölbreytni tónlistaratriða sé með besta móti.

Myndbandstöku af tónleikunum í ár verður streymt beint í gegnum KEXP.ORG, Kexland.is og MusicReach.tv og er það í fyrsta skiptið sem það verður gert.

Dagskrá tónlistaratriða er efirfarandi:

12:00 Sóley
13:00 Teitur Magnússon
14:00 Kælan Mikla
15:00 Futuregrapher
16:00 Markús and the Diversion session
17:00 Valdimar
18:00 Rökkurró
19:00 Muck
20:00 Gísli Pálmi
21:00 DJ Yamaho
22:00 Agent Fresco
23:00 Emmsje Gauti

Útgáfutónleikar Gísla Pálma í kvöld

Smekkleysa tilkynnir

…að annað upplag plötu Gísla Pálma verður dreift í verslanir í þessari viku. Á sama tíma fagnar Gísli Pálmi útgáfu fyrstu plötu sinnar með útgáfutónleikum í kvöld, þann 4. Júní, í Gamla Bíó.

Platan, sem kom út þann 16. apríl síðastliðinn, ber nafnið Gísli Pálmi, hefur hlotið einróma lof gagnrýnenda ásamt því að vera ein mest selda rapp plata síðustu ára.

Gísli Pálmi hefur fengið þá Sölva Blöndal og Egil Tiny úr Quarashi til að taka nokkur lög. Fleiri sem fram koma eru Sturla Atlas, Gervisykur og Vaginaboys.

Miðaverð er 2.900 kr. og er sala aðgöngumiða í Smekkleysu Plötubúð, Laugavegi 35., og á tix.is

LungA – Listahátíð ungs fólks

Lunga Art Festival by Magnus Elvar Jonsson1081
Í fréttatilkynningu segir:

Í sumar fagnar LungA hátíðin 15 ára afmæli sínu.
LungA er litrík, alþjóðleg listahátíð með fjölda viðburða í vikulangri dagskrá sem fer fram á Seyðisfirði dagana 12 – 19. Júlí. Á hátíðinni myndast einstakt samfélag þar sem fólk sækir innblástur í listir, umhverfið og hvort annað. Í fjölbreyttum listasmiðjum fá þátttakendur tækifæri til að kanna óþekktar hliðar á sjálfum sér og öðlast bæði ný tengsl og ógleymanlega reynslu.

Það er er ekki auðvelt að lýsa andrúmsloftinu á LungA. Prófessor Goddur orðaði það svona :

…það er sérstakt andrúmsloft hér sem erfitt er að lýsa. það er eins og að reyna að lýsa kynferðislegri fullnægingu fyrir fólki sem aldei hefur kynnst kynferðislegri fullnægingu – Seyðisfjörður er skapandi kynferðisleg fullnæging. Þú verður að upplifa hana til að skilja.

Í dag (1. júní) hefst miðasala á stórtónleika hátíðarinnar á tix.is og einnig verður opnað fyrir skráningar í listasmiðjur á www.lunga.is en síðast fylltust þær á fáeinum dögum!

Tónleikarnir verða hápunktur hátíðarinnar og fara fram laugardainn 18. júlí. Tónleikasvæðið við gömlu fiskvinnsluna verður ævintýraleg upplifun í sjálfu sér og á sérsmíðuðu sviði LungA koma fram hljómsveitirnar :

Sykur
Gangly
Grísalappalísa
Dj flugvél og geimskip
og Reykjavíkurdætur

Record Records gefur út This Is Icelandic Indie Music vol. 3

This Is Icelandic Indie Music Vol. 3
Í fréttatilkynningu segir:

Safnplötuserían This Is Icelandic Indie Music hefur notið mikillar hylli meðal innlendra og erlendra tónlistarunnenda síðastliðin tvö ár og er nú komið að útgáfu þeirrar þriðju. This Is Icelandic Indie Music Vol. 3 kemur í verslanir á geisladiski og á netveitur í dag, 29. maí. Vínillinn lendir svo um miðjan. júní.

This Is Icelandic Indie Music Vol. 3 inniheldur tólf lög með jafnmörgum flytjendum og af þeim eru fimm lög sem eru áður óútgefin. Einnig eru að finna fjögur lög tónlistarmanna sem ekki gefa út hjá Record Records og eru það hinn ungi Húsvíkingur Axel Flóvent, hljómsveitirnar Hjaltalín og Valdimar og tónlistarmaðurinn Teitur Magnússon. Ný og óútgefin lög eru eftir verðlaunahafann Júníus Meyvant sem gefur út sína fyrstu þröngskífu í sumar, Moses Hightower sem vinna að sinni þriðju breiðskífu og sömuleiðis Agent Fresco sem eru að leggja lokahönd á sína aðra breiðskífu. Vök úr Hafnarfirði gáfu út sína aðra þröngskífu þann 22. maí síðastliðinn og eiga þau nýtt lag á skífunni sem og Hjaltalín sem senda frá sér sitt nýjasta lag.

Lagalistin á This Is Icelandic Indie Music Vol. 3 er svohljóðandi:

  1. Júníus Meyvant – Hailslide
  2. Hjaltalín – We Will Live For Ages
  3. Axel Flóvent – Forest Fires
  4. Máni Orrason – Fed All My Days
  5. Vök – Waterfall
  6. FM Belfast – Holiday
  7. AmabAdamA – Gaia
  8. Moses Hightower – Snefill
  9. Mammút – Þau svæfa
  10. Agent Fresco – See Hell
  11. Teitur Magnússon – Vinur vina minna
  12. Valdimar – Ryðgaður dans

Extreme Chill Festival 2015 – Undir Jökli

ECF Poster

Íslenska tónlistarhátíðin Extreme Chill Festival – Undir jökli verður haldin helgina 7 – 9 ágúst næstkomandi á Hellissandi við rætur Snæfellsjökuls.

Þetta er í sjötta sinn sem hátíðin fer fram, en fimm ára afmæli hátíðarinnar var haldin í Berlín síðastliðið sumar við ótrúlegar undirtektir.

Dagskráin í ár er ekki af verri endanum en tónlistarmenn á borð við: Biosphere, Hilmar Örn Hilmarsson, Steindór Andersen, Mixmaster Morris, Studnitzky, Stereo Hypnosis, Dj Flugvél og Geimskip, Jónas Sen, Tonik Ensemble, Futuregrapher, Ruxpin, Skurken, Jóhann Eiríksson, o.fl. munu koma fram á hátíðinni.

Takmarkaðir miðar verða í boði í ár og kostar passinn á hátíðina aðeins 7900 kr. Við hvetjum því fólk til að tryggja sér passa tímanlega en síðustu ár hefur selst upp og komust færri að en vildu. Hægt er að nálgast miða inn á mida.is

Mjög gott tjaldsvæði er á Hellissandi, en það opnaði sumarið 2011 og er staðsett í fallegu hrauni er kallast Sandahraun. Á svæðinu er þjónustuhús með salerni, sturtum og vaskarými. Skemmtilegar gönguleiðir eru í næsta nágrenni, fallegar fjörur með öllum þeim ævintýrum sem þær bjóða uppá. Sólsetrin við Breiðafjörð séð frá Sandahrauni eru óviðjafnanleg og Þjóðgarðurinn Snæfellsjökull er næsti nágranni við tjaldsvæðið.

Frekari upplýsingar og dagskrá er að finna á heimasíðu Extreme Chill. www.extremechillfestival.com

Sumarmölin 2015

Sumarmölin 2015

Tónlistarhátíðin Sumarmölin fer fram í þriðja sinn í Samkomuhúsinu Baldri á Drangsnesi þann 13. júní næstkomandi. Hátíðin er rómuð fyrir einstaka stemningu þar sem fólk á öllum aldri kemur saman og nýtur frábærrar tónlistar í einstöku umhverfi.

Fyrir Sumarmölina í ár var rjóminn fleyttur ofan af íslensku tónlistarlífi og sett saman ómótstæðileg dagskrá þar sem allir ættu að geta fundið eitthvað við sitt hæfi.

Á hátíðinni í ár koma fram:
  • Sóley
  • Retro Stefson
  • Tilbury
  • Ylja
  • Borko
  • Kveld-Úlfur
  • Berndsen

16 ára aldurstakmark er á tónleikana en yngri tónleikagestir eru hjartanlega velkomnir í fylgd með fullorðnum.

Tónleikarnir hefjast klukkan 19:30 en húsið opnar um hálftíma fyrr.

Að tónleikum loknum munu FM Belfast DJar halda upp stuði og stemningu fyrir dansþyrsta tónleikagesti á Malarkaffi fram á nótt.

Miðaverð er 4500 kr. í forsölu
Hægt er að kaupa 2 miða og gistingu fyrir 2 á Malarhorni á aðeins 25.000 kr.
Aðgangur er ókeypis fyrir 12 ára og yngri.

Forsala aðgöngumiða fer fram á tix.is.

ATP á Íslandi – Síðustu nöfn tilkynnt og opnað fyrir umsóknir upprennandi listamanna

ATP logo

Tónlistarhátíðin ATP á Íslandi hefur nú tilkynnt síðustu nöfn listamanna sem munu koma fram á hátíðinni í ár, 2. – 4. júlí.

Val listamannanna að þessu sinni er í höndum Bedroom Community útgáfunnar annarsvegar og Rásar 2 hinsvegar. Báðir aðilar hafa valið þrjá listamenn til að koma fram á Andrew’s Theatre sviðinu, en auk þeirra munu tveir listamenn til viðbótar hafa möguleika á að troða upp á hátíðinni í ár í gegnum sérstaka keppni á vegum ATP (sjá að neðan).

Listamennirnir eru sem hér segir:

Bedroom Community í Andrews Theatre – föstudagur, 3. júlí:

  • Valgeir Sigurðsson ásamt Liam Byrne
  • Daníel Bjarnason
  • JFDR
  • Vinningshafi – upprennandi listamaður/hljómsveit

Rás 2 í Andrews Theatre – laugardagur, 4 .júlí:

  • Pink Street Boys
  • Rythmatik
  • Börn
  • Vinningshafi – upprennandi listamaður/hljómsveit

Með þessari nýju viðbót er heildarlisti yfir þá listamenn sem koma fram sem hér segir:
Iggy Pop, Drive Like Jehu, Belle and Sebastian, Public Enemy, Swans, Godspeed You! Black Emperor, Run The Jewels, Mudhoney, Loop, Lightning Bolt, Bardo Pond, Kiasmos, HAM, Ghostigital, Ought, Clipping, The Bug, Younghusband, Xylouris White, Deafheaven, Iceage, Chelsea Wolfe, The Field, White Hills, Ghostigital, Oyama, Vision Fortune, Grísalappalísa, Valdimar, Stafrænn Hákon, Mr Silla, Kippi Kaninus, Tall Firs, Grimm Grimm, Ben Frost + Valgeir Sigurðsson, Daníel Bjarnason, Jófríður (sóló), Pink Street Boys, Rythmatik og Börn.

Nú hefur verið opnað fyrir umsóknir ungra & upprennandi listamanna, en þeir sem sækja um eiga möguleika á því að koma fram á hátíðinni í ár. Valið er í höndum Bedroom Community og Rásar 2 sem velja eitt atriði hvort fyrir sín kvöld í Andrews Theatre. Jafnframt verða tveir listamenn til viðbótar valdir sem 3. og 4. sæti og hljóta að launum hátíðarpassa á ATP á Íslandi.

Hægt er að sækja um hér fram til 26. maí en einnig er frekari upplýsingar þar að finna.

Bráðlega verður svo tilkynnt um hverjir munu koma til með að velja kvikmyndadagskrá hátíðarinnar í ár og hvaða veitingar verða í boði á hátíðarsvæðinu.

Of Monster and Men frumflytja nýtt lag

Í fréttatilkynningu segir:

Of Monsters and Men tilkynna hér með að langþráð önnur breiðskífa þeirra, sem hlotið hefur heitið Beneath The Skin, mun koma út 8. júní á Íslandi á vegum Record Records. Þessi margrómaði kvintett frumflytur í dag fyrstu smáskífuna “Crystals” á öldum ljósvakans.

Íslenska útgáfa breiðskífunnar mun innihalda lögin “Backyard” og “Winter Sound” sem verður ekki að finna á hefðbundinni útgáfu breiðskífunnar erlendis heldur eingöngu á viðhafnarútgáfum og þeirri íslensku.

Hljómsveitin hefur eytt síðastliðnu ári á Íslandi og í Los Angeles með upptökustjóranum Rich Costey sem vann með þeim að breiðskífunni en hann hefur unnið með hljómsveitum á borð við Muse, Death Cab for Cutie, Foster The People og Interpol.

Árstíðir gefa út sína þriðju plötu

Árstíðir - Hvel

Í dag, föstudaginn 6. mars, gefur hljómsveitin Árstíðir út sína þriðju breiðskífu. Platan hefur hlotið nafnið Hvel og hefur hennar verið beðið með nokkurri eftirvæntingu, allt frá því hljómsveitin tilkynnti síðasta vor að efnt yrði til söfnunar í gegnum heimasíðuna Kickstarter til að fjármagna útgáfuna.

Markmiðinu var náð á einungis nokkrum dögum og áður en yfir lauk höfðu yfir 1500 manns lagt hljómsveitinni lið með fjárframlögum gegn loforði um að fá ýmsan varning sendan heim að dyrum. Auk plötunnar sjálfrar var t.a.m boðið uppá sérsniðnar íslenskar lopapeysur og ösku úr Eyjafjallajökli, svo dæmi séu tekin.

Það má segja að hljómur Árstíða hafi þróast og tekið ýmsum breytingum frá því síðasta plata, Svefns og vöku skil var gefin út árið 2011. Mannabreytingar hafa orðið á sveitinni í millitíðinni og ber nýji hljómurinn þess merki. Meðlimir hafa því að nokkru leyti fetað nýjar slóðir á nýju plötunni og gætir nú rafrænna áhrifa meira en á fyrri breiðskífum, auk þess sem trommuásláttur setur sinn svip á nokkur lög plötunnar.

Portraits of the Icelandic band Árstí?ir taken on-location at Toppstö?in power station in Reykjavík, Iceland. March 26, 2014.

Platan Hvel var samin og tekin upp að hluta til í gömlu rafstöðinni í Elliðaárdal, þar sem hljómsveitin hefur haft æfingaraðstöðu síðustu tvö árin. Upptökustjóri plötunnar er Styrmir Hauksson sem meðal annars hefur unnið með GusGus, Ásgeiri Trausta, Bloodgroup og Retro Stefson. Hljóðjöfnun annaðist Glenn Schick, en sá hefur hefur unnið með stórum listamönnum á borð við Elton John, Jutin Bieber og Skid Row.

Síðustu ár hefur hljómsveitin verið á ferð og flugi erlendis og spilað á tónleikum í meira en 30 löndum. Ekkert er lát á ferðalögum því í vor mun hljómsveitin fylgja Hvel á eftir með þremur tónleikaferðalögum um Þýskaland, Austurríki og Bretland, og í sumar er fyrirhugað sex vikna tónleikaferðalag um Bandaríkin.

Hljómsveitin gefur sjálf út og dreifir plötunni rafrænt, en er einnig með plötusamning við Þýska útgáfufyrirtækið Beste Unterhaltung sem gefur út plötur sveitarinnar í Bretlandi, Þýskalandi, Austurríki og Sviss.

Hvel er þriðja hljóðversplata Árstíða í fullri lengd, en áður hafa komið út plöturnar Árstíðir (2009), Svefns og vöku skil (2011) og Ep-platan Tvíend (2012) sem inniheldur endurhljóðblandanir (remix) af lögum sveitarinnar.

Tónleikar í kvöld, 6 Mars

Formlegir útgáfutónleikar verða síðan haldnir þegar nær dregur vori. En til að fagna útgáfunni mun hljómsveitin halda tónleika á Café Rósenberg í kvöld (föstudagskvöld), en segja má að hljómsveitin hafi byrjað feril sinn með tónleikahaldi þar. Tónleikarnir hefjast kl. 22:00 og verður nýja platan í boði á sérstöku tilboðsverði.

Reykjavík Folk Festival hefst í kvöld á Kex Hostel

Reykjavik Folk Festival

Í fréttatilkynningu segir:

Þjóðlagatónlistarhátíðin Reykjavík Folk Festival verður haldin í fimmta sinn á Kex Hostel við Skúlagötu dagana 5.- 7. mars 2015. Dagskrá hátíðarinnar er ætlað að blanda saman þjóðlagatónlistarmönnum og -hljómsveitum á ólíkum aldri og frá ólíkum áttum innan þjóðlagatónlistarheimsins. Hátíðin fer fram í notalegum húsakynnum Kex Hostels og verður ekkert til sparað við að skapa notalega og einlæga stemmningu og ógleymalega tónlistarveislu fyrir alla unnendur þjóðlagatónlistar.

Þeir listamenn sem koma fram á hátíðinni í ár eru; Teitur Magnússon, Ylja, Kólga, Funi, Moð, Lindy Vopnfjord (CA), Klassart, Lay Low, JP Hoe (CA), Björn Thoroddsen, Pétur Ben og Egill Ólafsson.

Fyrir hátíðina 2015 viljum við varpa ljósi á þjóðlagatónlistarhefð Kanada með hliðsjón af tengingu Íslands við Kanada og reyna að efla tengsl á milli þessara þjóða í gegnum þjóðlagatónlistarhefðina. Við bjóðum því tveimur kanadískum listamönnum frá Winnipeg sem eiga ættir að rekja til Íslands, þá Lindy Vopnfjörð og JP Hoe velkomna á hátíðina.

Miðaverð á hátíðina er 3.000 kr fyrir stök kvöld en 7.999 kr fyrir passa sem gildir á öll 3 kvöldin. Dagskrá hátíðarinnar hefst kl. 20 öll kvöl og líkur kl. 23:30.

Miðasala fer fram á Tix.is

Public Enemy, Swans, Lightning Bolt, Bardo Pond o.fl. bætt við ATP

ATP logo

Í fréttatilkynningu segir:

Pólitískt hlöðnu hipphopp sveitina Public Enemy ættu flestir að þekkja sem fremsta meðal jafningja, sem treður upp hér á landi í fyrsta sinn í ár. Hinnar goðsagnakenndu Swans hefur verið beðið af mikilli eftirvæntingu af æstum aðdéndum sveitarinnar hér á landi. Bardo Pond frá Philadelpiu bjóða upp á einstakt 90’s geim-rokk sitt og Lightning Bolt fylgja eftir plötu sinni Fantasy Empire með tónleikum sem munu án efa reyna á hávaðamörk áhorfenda. Íslensku hljómsveitirnar þarf svo varla að kynna, en saman sýna þær fjölbreytta flóru íslenskrar tónlistar, merkta sama gæðastimplinum. Þær eru : GrísalappalísaValdimar, Stafrænn Hákon, Oyama, Mr Silla og Kippi Kaninus.

Til að mæta fjölda fyrirspurna hefur hátíðin nú sett á laggirnar nýtt fyrirkomulag sem gerir áhugasömum kleift að skipta greiðslum helgarpassa (auk rútuferða) til helminga. Hér má greiða fyrri helming (til og með 30. apríl), en að því loknu fær viðkomandi sendan link með frekari upplýsingum um seinni greiðsluna (til og með 31. maí). Athugið: Mikilvægt er að greiða innan þessara dagsetninga, annars eru miðakaupin ógild.

Almenna miða má nálgast á midi.is þar sem einnig er hægt að lesa meira um fyrirkomulag miðasölu og þá möguleika sem eru í boði.

Hægt er að fjárfesta í þjónustu Rent-A-Tent sem bjóða upp á tilbúin tjöld ásamt fylgihlutum og aðgengi hátíðar-tjaldsvæðisins, svo það eina sem þarf að gera er að mæta á svæðið. Sjá meira hér.

ATP verður haldin á Ásbrú, fyrrum varnarliðssvæðinu, sem á sér sögu sem rekur aftur til ársins 1941 en bandaríski herinn yfirgaf svæðið árið 2006. Svæðið er staðsett í fimm mínútna aksturfjarlægð frá Flugstöð Leifs Eiríkssonar og Reykjanesbæ, um korter frá Bláa Lóninu og hálftíma frá höfuðborgarsvæðinu. Á hátíðarsvæðinu verða tvö svið sem bæði eru innandyra, auk annars konar skipulagðrar dagskrár sem tilkynnt verður um síðar. Líkt og fyrri ár verður hægt að kaupa krásir á viðráðanlegu verði á hátíðarsvæðinu, en í ár verður úrvalið breikkað og sölustöðum bætt við flóruna.

Red Barnett – Útgáfutónleikar og söfnun á Karolina Fund

Í fréttatilkynningu segir:

Haraldur V. Sveinbjörnsson gefur út sólóplötuna Shine undir nafninu Red Barnett og hrindir af stað söfnun á Karolina Fund. Útgáfutónleikar eru fyrirhugaðir í Fríkirkjunni 17. apríl sama dag og listamaðurinn fagnar stórafmæli sínu. Lagið “Life Support” þegar komið á vinsældarlista Rásar 2.

Tónlistarmaðurinn Haraldur V. Sveinbjörnsson, sem öllu jafna er kallaður Halli, sendir bráðlega frá sér sína fyrstu sólóplötu undir listamannsnafninu Red Barnett. Halli er þúsundþjalasmiður í tónlist og hin síðari ár hefur hann verið í hringiðu margra af athyglisverðustu tónlistarviðburðum landsins, þótt hans hlutverk hafi á stundum verið talsvert falið. Hann útsetti tónlist Skálmaldar fyrir Sinfóníuhljómsveit Íslands, en þeir tónleikar hlutu í síðasta mánuði Íslensku tónlistarverðlaunin sem viðburður ársins. Hann hefur auk þess útsett tónlist Gunnars Þórðarssonar, Pink Floyd og Páls Óskars fyrir Sinfó, svo fátt eitt sé nefnt.

Red BarnettHalli er lærður í klassískum tónsmíðum en er ekki einhamur í tónlist. Snemma vakti hann áhuga margra sem gítarleikari og helsti lagasmiður gruggsveitarinnar goðsagnakenndu Dead Sea Apple, sem freistaði gæfunnar í hinum stóra heimi. Hann er annar söngvara Manna Ársins og tók nú nýverið við stöðu bassaleikara í hljómsveitinni Buff. Hann hefur síðustu misserin komið reglulega fram með Dúndurfréttum og Skálmöld sem hljómborðsleikari. Þá hefur Halli unnið með og útsett fyrir fjölda tónlistarmenn bæði íslenska og erlenda.

Að sögn Halla er hugmyndin um að gefa út sólóplötu undir nafni Red Barnett orðin ríflega 10 ára gömul. Fyrsta lagið var tekið upp árið 2005 og undanfarinn áratug hafa lögin verið hljóðrituð samhliða öðrum, fyrirferðarmeiri verkefnum Halla. Smátt og smátt hefur sólóskífan því tekið á sig mynd og nú ætlar Halli að gefa sjálfum sér og aukasjálfinu Red Barnett, fullt pláss til þess að skína.

Tónlist Red Barnett er best lýst sem angurværri rökkurtónlist og yrkisefnið er lífið og tilveran í stóra samhenginu. Halli sér að langmestu leyti um upptökur og hljóðfæraleik sjálfur en nokkrir góðir kunningjar hafa lagt honum lið á langri leið. Nýlega fór lagið “Life Support” í spilun og við sama tækifæri tilkynnti Halli um hópsöfnun/forsölu á plötunni á vef Karolina Fund til að fjármagna lokahnykk útgáfunnar. Útgáfunni verðu svo fagnað með sérstökum útgáfutónleikum í Fríkirkjunni þann 17. apríl næstkomandi en miðasala verður auglýst fljótlega. Þess má geta að sama dag fagnar listamaðurinn 40 ára afmæli sínu.

Hljómsveitin A & E Sounds stefnir á útgáfu sinnar fyrstu breiðskífu

A & E Sounds
Í fréttatilkynningu segir:

A & E Sounds er hugarfóstur þeirra Þórðar Grímssonar og Kolbeins Soffíusonar og hafa þeir síðastliðna mánuði verið að leggja lokahönd á 10 laga breiðskífu.

Þórður Grímsson er með BA í myndlist og er starfandi myndlistarmaður. Hann hefur haldð nokkrar einkasýningar í Reykjavík m.a. í Dauðagallerí, Artíma, Kaolin, Crymo o. fl. Hann stofnandi hljómsveitarinnar Two Step Horror sem hefur gefið út eina plötu, Living Room Music hjá útgáfunni Outlier Records og fékk afbragsdóma bæði innanlands og utan. Two Step Horror hafa gefið út tvær plötur til viðbótar á rafrænu formi og hafa komið fram á tónleikum í Reykjavík og Berlín.

Þórður er nú að klára BA nám í grafískri hönnun við Listaháskóla Íslands. Hugmyndin að A & E Sounds kviknaði hjá Þórði þegar hann stundaði nám við Weissensee listaháskólann í Berlín árið 2014 og samdi hann þar lögin ásamt því að taka upp demo.

A & E Sounds

Kolbeinn Soffíuson (einnig áður Two Step Horror) er nýútskrifaður úr hljóðtækni frá Stúdíó Sýrlandi og var umrædd plata lokaverkefni hans í því námi. Þórður útskrifast í vor úr grafískri hönnun við Listaháskóla Íslands og mun fyrir lokasýningu LHÍ hanna allt myndrænt útlit plötunnar.

Tónlist A & E sounds mætti lýsa sem draumkenndu og lágstemmdu sveimrokki undir áhrifum frá Spiritualized, Slowdive, Jonathan Richman og Ride, en með sterkum kraut undirtón Neu!, Harmonia, La Düsseldorf o.fl.

Þórður og Kolbeinn hafa nú hafið söfnun á síðunni Karolina Fund til þess að fjármagna pressun á vínyl og prentun á myndefni. Söfnunin stendur til 6. apríl og geta áhugasamir pantað sér eintak af plötunni í forsölu á vefsíðu verkefnisins.

Ástralski listamaðurinn Jonathan McCabe hefur gert tónlistarmyndband við fyrsta “single” sveitarinnar, en hann vinnur með stærðfræði formúlur Alan Turing og blandar þeim við tölvuvinnslu og útkoman er þetta lífræna samspil lita á hreyfingu.

Á bandcamp síðu A & E Sounds er hægt að hala niður frítt tveimur lögum með hljómsveitinni:

Anna María sendir frá sér plötuna Hver stund með þér

Í fréttatilkynningu segir:

Anna María Björnsdóttir er að gefa út sína aðra sólóplötu Hver stund með þér. Anna María samdi alla tónlistina á plötunni við ástarljóð sem afi hennar, Ólafur Björn Guðmundsson, orti til ömmu hennar, Elínar Maríusdóttur, yfir 60 ára tímabil. Samhliða geisladisknum er verið að klára heimildarmynd um ljóðin, ástina, Óla og Ellu. Svavar Knútur Kristinsson syngur og spilar með Önnu Maríu á plötunni sem tekin var upp síðastliðið sumar á heimili foreldra Önnu Maríu í Garðabæ.

Anna María sá þessi ljóð fyrst eftir að afi hennar og amma voru bæði látin og fannst henni þau geyma mikinn fjársjóð um ástina og það fagra í heiminum.

,,Ljóð afa til ömmu fela í sér fallegan boðskap um hvernig ástin getur haldist hrein og vaxið og dafnað í heila mannsævi. Þau hafa haft sterk áhrif á mig og langaði mig að gera þau aðgengileg fleirum á þann hátt sem best liggur fyrir mér, með söng og tónlist. Ég settist því niður við píanóið mitt í Kaupmannahöfn fyrir tæpum tveimur árum og hóf að semja og útsetja tónlist við ljóðin. Árangurinn af því er þessi plata. Vona ég að ljóðin hans afa muni þannig lifa áfram og veita öðrum þá gleði sem þau hafa veitt mér.“

segir Anna María.

Útgáfutónleikarnir verða fimmtudagskvöldið 12.mars kl 20:00 í Salnum í Kópavogi. Miðasala á midi.is

Secret Swing Society á Café Rosenberg, 25. febrúar

Secret Swing Society

Í fréttatilkynningu segir:

Hljómsveitin Secret Swing Society heldur tónleika á Café Rosenberg, Klapparstíg, miðvikudagskvöldið 25. febrúar kl. 21:00.

Hljómsveitin leikur og syngur gamaldags sveiflutónlist, frumsamda og ættaða frá höfundum og flytjendum á borð við Duke Ellington, Gershwin bræðrum, Louis Armstrong, The Mills Brothers, Louis Prima, Django Reinhardt og Fats Waller.

Hljómsveitin var stofnuð í Amsterdam árið 2010, meðan meðlimir hennar stunduðu þar tónlistarnám, og hefur hún spilað mikið úti á götum, mörkuðum og síkjum borgarinnar. Einnig hefur hún ferðast til fleiri borga í Hollandi, Belgíu, Frakklandi, Þýskalandi, Litháen og á austurströnd Bandaríkjanna, ýmist til að spila á jazzhátíðum, tónleikum eða úti á götum. Secret Swing Society hafa tvisvar komið fram á Jazzhátíð Reykjavíkur, ásamt því að standa sjálfir fyrir tónleikum og dansleikjum í Reykjavík og úti á landi.

Meðlimir eru Andri Ólafsson á kontrabassa, Grímur Helgason klarinettleikari, franski gítaristinn Guillaume Heurtebize, trompetleikarinn Dominykas Vysniauskas frá Litháen, og píanistinn, Hafnfirðingurinn og harmónikkuleikarinn Kristján Tryggvi Martinsson, en þeir syngja allir.

Rjóminn frumsýnir nýtt myndband Just Another Snake Cult

Rjóminn frumsýnir nýtt myndband við lagið “What Was Yr Name Again?” en það er að finna á örskífu Just Another Snake Cult sem nefnist Lost in The Dark.

Just Another Snake Cult býður nú upp á áskrift að tónlist sinni. Innifalið í áskrift er meðfylgjandi lag ásamt öllu öðru sem sveitin hefur sent frá sér, jafn vel plötur sem eru löngu uppseldar og hvergi fáanlegar, auk þess sem Költið kemur til með að gefa út.

Áhugasamir geta smellt sér í áskrift á Bandcamp síðu sveitarinnar.

Þórir, forsprakki Just Another Snake Cult , og Ásthildur Ákadóttir munu spinna einhverja ljúfa tónlist saman í nokkra klukkutíma á lowercase nights tónleikaröðinna á Húrra núna á sunnudaginn 22. febrúar.

Þess má svo geta að Þórir var að pródúsera plötu fyrir leikritið Lísa í Undralandi sem Leikfélag Akureyrar setur upp en tónlistin er samin af Dr. Gunna. Platan fæst ókeypis á undralandla.bandcamp.com