Rúnar Þórisson heldur útgáfutónleika á Café Rosenberg

Rúnar Þórisson og hljómsveit

Rúnar Þórisson heldur útgáfutónleika á Café Rosenberg, Klapparstíg 27. föstudaginn 15. janúar n.k. Eftir að hafa spilað með hljómsveitinni Grafík um langt skeið þá hóf Rúnar árið 2005 að gera sólóplötur og eru þær nú orðnar fjórar talsins auk þess sem hann hefur verið að spila töluvert á tónleikum og tónlistarhátíðum, nú síðast á Iceland Airwaves. Nýjasta platan Ólundardýr kom út 7. nóvember s.l. en að baki útgáfunni lá ákveðin hugmynd og hvati sem hófst í 12. janúar s.l. að fyrsta lagið kom út á vefnum og í kjölfarið eitt lag á mánuði þar til 7. nóvember að afraksturinn er allur gefinn út en þann dag hefði faðir Rúnars orðið áttræður. Umsagnir og dómar um Ólundardýr hafa verið mjög lofsamlegir og hefur hún ratað á nokkra lista yfir bestu plötur ársins 2015, m.a. hér á Rjómanum.

Ákveðin sérstaða er fólgin í því að með Rúnari vinna í tónlistinni tvær dætur hans, Lára og Margrét sem syngja, radda og spila á hljómborð en þær hafa báðar líka gefið út plötur á síðasta ári, Lára plötuna Þel og Margrét plötu með hljómsveitinni Himbrimi. Hljómsveit Rúnars skipa einnig Arnar Þór Gíslason á trommur og Birkir Rafn Gíslason á gítar og Guðni Finnsson á bassa en þeir hafa einnig leikið með hljómsveitum eins og Ensími, Himbrimi, Pollapönk og Mugison.

Afskræming Svavars Knúts í Mengi

Afskræming Svavars

Útgáfu og viðburðafélagið FALK kynnir “AFSKRÆMINGU SVAVARS KNÚTS” einstakan tónlistarviðburð í Mengi, þar sem hljómfagrir tónar söngvaskáldsins Svavar Knúts drukkna í rafstraumum KRAKKKBOT og AMFJ.

Söngvaskáldið ástsæla Svavar Knútur mun ásamt raf- og óhljóðalistamönnunum KRAKKKBOT og AMFJ flytja lög sín í Mengi næstkomandi laugardagskvöld, 9. janúar klukkan 21:00 – húsið opnar klukkan 20:00.

Á tónleikunum mun Svavar leika úrval af lögum sínum á sinn einstaklega einlæga hátt, einn með gítarinn og röddina fögru. Hætt er þó við því að aðdáendum Svavars Knúts bregði í brún, því hljóð hans munu verða brotin og afskræmd, teygð og toguð, sléttuð og felld í meðförum þeirra félaga KRAKKKBOT og AMFJ.

Það verður sannkölluð hljóðveisla í Mengi þegar þessir andstæðu pólar mætast í samvinnu eða baráttu. Kvöldvaka sem fer allan skalann frá hinu mikilfenglega til hins viðkvæma, um ölduslóð sínusbylgjunnar að broti raddarinnar.

Hér að neðan má heyra viðtal tekið af Elísabetu Indru Ragnarsdóttur fyrir hönd Mengis, en þar ræða Baldur og Svavar Knútur um vináttu, andstæða póla í tónlist og hvers vænta má á laugardaginn kemur.

Markús & The Diversion Sessions halda tónleika á Kex Hostel

Markús & The Diversion Sessions

Markús & The Diversion Sessions blása til tónleika í Gym & Tonic á KEX Hostel næstkomandi föstudagskvöld, 18. desember klukkan 21:00. Hljómsveitin mun spila flest lögin af nýútkominni plötu sinni, The Truth The Love The Life, ásamt fleiri eldri og nýrri laga.

Sveitin leggst í hýði á nýju ári þar til útgáfutónleikar verða haldnir í mars/apríl. Þetta er því einstakt tækifæri til þess að hlýða á tónleika af stærri gerðinni með sveitinni. Gestaspilarar verða með og ætla að skreyta lögin með lúðrablæstri , slagverki og bakröddum. Sveitin kíkti í stúdíó nýverið og vann í nýjum lögum. Þau verða til flutningar á tónleikunum ásamt öllum hinum og tökulagi í anda árstíðarinnar.

Markús & the Diversion Sessions skipa þeir Ási Þórðarson, Georg Kári Hilmarsson, Markús Bjarnason og Marteinn Sindri Jónsson.

Húsið opnar kl. 20:30 og byrja tónleikarnir stundvíslega kl. 21:00.

Forsala miða er á Tix.is og er verð í forsölu 1000 krónur, verð á miðum við hurð er 1500 krónur.

Fyrstu listamenn á ATP 2016 kynntir

ATP Iceland 2016

Sleep, Thee Oh Sees, Ty Segall and The Muggers, Angel Olsen, Les Savy Fav, Tortoise, ásamt fleiri listamönnum koma fram á ATP á Íslandi 2016!

John Carpenter, Anika, Yasmine Hamdan, Blanck Mass og Mueran Humanos spila einnig á hátíðinni. Örvar Smárason og Gunnar Tynes úr múm hafa að auki verið staðfestir en þeir leika undir á sérstakri sýningu myndarinnar Menschen am Sonntag.

Tónlistarhátíðin ATP á Íslandi tilkynnir hér í annað sinn nöfn framúrskarandi listamanna sem koma fram á tónlistarhátíðinni næsta sumar á Ásbrú dagana 1. til 3. júlí 2016.

Sleep, Thee Oh Sees, Ty Segall and The Muggers, Angel Olsen, Les Savy Fav og Tortoise, eru nýjustu viðbæturnar á glæsilegri dagskrá ATP sem skartar nú þegar sjálfum meistara hryllingsmyndanna, hinum goðsagnakennda John Carpenter, sem í fyrsta sinn á ferlinum flytur tónlist sína opinberlega.

Rithöfundurinn, ljóðskáldið og tónlistarkonan Anika (Invada, Stones Throw) mun koma fram með líbísku söngkonunni og lagahöfundinum Yasmine Hamdan, Blanck Mass mætir en það er sólóverkefni sem Benjamin John Power úr Fuck Buttons ber ábyrgð á. Argentínska dúóið Mueran Humanos sem býr nú í Berlín kemur einnig en þau gefa út hjá ATP Recordings.

Að lokum hafa Örvar Smárason & Gunnar Tynes (múm) verið bókaðir á hátíðina en þeir munu spila tónlist undir sýningu myndarinnar Menschen am Sonntag (People on Sunday) – en þetta er þýsk þögul kvikmynd síðan 1930 sem er byggð á handriti Billy Wilder. Einnig er vert að geta þess að hinn virti uppistandari Stewart Lee mun bregða undir sig betri fætinum en hann kemur sjaldan fram erlendis.

Tilkynnt verður um fleira listafólk og hljómsveitir sem koma fram á ATP á Íslandi 2016 síðar.

Risaeðlan kemur saman á ný

Risaeðlan

Hljómsveitin Risaeðlan kemur saman á ný og spilar á tónlistarhátíðinni Aldrei fór ég suður á Ísafirði um næstu páska. Það verða að teljast frábær tíðindi fyrir tónlistaráhugafólk, en sveitin þótti með því allra skemmtilegasta og ferskasta í íslenskri tónlist á tíunda áratugnum.

Risaeðlan er skipuð þeim Möggu Stínu söngkonu og fiðluleikara, Halldóru Geirharðsdóttur söngkonu og saxafónleikara, Ívari Bongó Ragnarssyni bassaleikara, Þórarni Kristjánssyni trommara og Sigurði Guðmundssyni gítarleikara. Hljómsveitin var stofnuð 1984 og gaf út plötuna Fame and Fossils árið 1990. Sveitin starfaði með hléum næstu árin en gáfu þó út plötuna Efta! árið 1996 og urðu útgáfutónleikar þeirrar plötu að eiginlegum lokatónleikum sveitarinnar.

Hljómsveitin hefur nú svarað kallinu frá Aldrei fór ég suður, rokkhátíð alþýðunnar á Ísafirði og kemur fram opinberlega í fyrsta sinn eftir tuttugu ára fjarveru. Allir fyrrnefndir liðsmenn sveitarinnar spila með Risaeðlunni við þetta tilefni.

Mixophrygian fagnar útgáfu sinnar fyrstu breiðskífu á KEX Hostel

Mixophrygian

Eins manns hljómsveitin Mixophrygian heldur útgáfutónleika á Kex Hostel miðvikudagskvöldið 2. September kl. 21:00. Hljómsveitina skipar Daði Freyr Pétursson.

Platan kemur fyrst út eingöngu á netinu, verður fáanleg á iTunes og Bandcamp, einnig verður hægt að streyma henni frítt í gegnum Spotify og Soundcloud. Seinna á þessu ári kemur hún síðan út á tvöfaldri vínylplötu í 300 eintökum sem var fjármagnað með crowdfunding síðunni Indiegogo.

Þetta er 14 laga consept plata, þar sem lögin eru sett upp eins og saga þegar hún er spiluð í heild sinni. Þetta verður í fyrsta og jafnvel eina skyptið á Íslandi sem platan verður tekin í heild sinni í réttri röð. Sagan fyrir hvert lag verður líka sögð. Þetta verða einu tónleikar Mixophrygian á Íslandi í ár þar sem viku eftir tónleika fer Daði út til Berlínar þar sem hann stunda nám við DBs music skólann, en þar verða haldnir fleiri tónleikar á þessu ári.

Meira má finna á heimasíðunni www.mixophrygia.com

Jazzhátíð Reykjavíkur 2015

Jazzhátíð Reykjavíkur verður haldin í 26. sinn dagana 12.-16. ágúst í Hörpu. Hátíðin í ár leggur áherslu á nýsköpun, íslenska útgáfu og samstarfsverkefni innlendra og erlendra tónlistarmanna. Jafnframt er sérstakur fókus á konur í jazzmúsík í tilefni af 100 ára kosningarafmælis kvenna á íslandi.

Snorri Sigurðarson

Mikill fjöldi af nýjum íslenskum jazzútgáfum verður kynntur á hátíðinni í ár og er það til marks um mikla grósku í íslensku jazzlífi. Trió Sunnu Gunnlaugsdóttur, Mógil, Scott McLemore ásamt Hilmari Jenssyni og Angeliku Niescier, Jónsson&More, Sigurður Flosason, Leifur Gunnarsson, Ásgeir Ásgeirsson, Tómas R. Einarsson ásamt Ómari Guðjónssyni kynna öll nýjar útgáfur á hátíðinni í ár og frumflytja efni sitt á Jazzhátíð Reykjavíkur 2015.

Tómas R.Jazzhátíð í ár verður þjófstartað í Bíó Paradís, þriðjudaginn 11. ágúst, með frumsýningu á nýrri heimildarmynd í leikstjórn Jóns Karls Helgasonar. Efnistök myndarinnar er Tómas R. Einarsson kontrabassaleikari og lagahöfundur sem er löngu landskunnur, ekki síst fyrir latín tónlist sína. Í kvikmyndinni Latínbóndinn kynnumst við manninum bak við bassann og lögin og því hvernig það vildi til að sveitastrákur úr Dölunum elti tónlistargyðjuna út í heim og alla leið til Havana á Kúbu og snéri loks til baka í heimahagana með heita og litríka latínveislu í farangrinum.

Nánari upplýsingar um hátíðina er að finna á www.reykjavikjazz.is og á Facebook www.facebook.com/Rvk.Jazz

Ensími sendir frá sér lagið „Herðubreið“ og heldur tónleika á Akureyri

Ensími - Herðubreið
Í fréttatilkynningu segir:

Hljómsveitin Ensími gaf út nýverið sína fimmtu breiðskífu sem nefnist Herðubreið. Sveitin hljóðritaði plötuna sjálf og sá Hrafn Thoroddsen um upptökustjórn. Platan var hljóðblönduð af Arnari Guðjónssyni hjá Aeronaut Studios og tónjöfnuð af Grammy verðlaunahafanum Mandy Parnell hjá Black Saloon Studios í Bretlandi. Linda Loeskow sá um hönnun umslags.

Fyrsta lagið af plötunni í spilun var ,,Aukalíf” og vakti mikla lukku. Það náði á topp vinsældarlista X977 og situr þar enn þegar þetta er ritað. Næsta lag sem fer í spilun af plötunni er titillag plötunnar ,,Herðubreið”.

Ensími hélt vel heppnaða útgáfutónleika í Gamla Bíó í júní og mun halda sérstaka útgáfutónleika fyrir norðan á Græna Hattinum þann 23. Júlí næstkomandi. Sveitin mun leika Herðubreið í heild sinni ásamt vel völdum slögurum úr sarpi sveitarinnar. Hægt verður að versla plötuna á tónleikunum og fá hana áritaða af meðlimum Ensími. Forsala miða er hafin í Eymundsson.

Ensími mun einnig troða upp á Bræðslunni en löngu er orðið uppselt á hátíðina.

Skarkali tríó

Skarkali

Tríóið Skarkali var stofnað sumarið 2013. Áður hafa liðsmenn spilað saman í mörgum hópum við hin ýmsu tilefni eftir að hafa kynnst í Tónlistarskóla FÍH. Þaðan hafa þeir allir útskrifast á síðustu árum.

Skarkali flytur frumsamda jazztónlist eftir píanóleikarann Inga Bjarna Skúlason þar sem fjölbreytnin er höfð í fyrirrúmi. Fágaður bassaleikur Valdimars Olgeirssonar og kraftmikill trommuleikur Óskars Kjartanssonar setja tónlistina á hærra plan.

Skarkali tríó hefur gefið út sína fyrstu plötu og heitir hún einfaldlega Skarkali. Platan er nú fáanleg í helstu plötubúðum landsins. Á disknum eru níu frumsamin lög í fjölbreyttum jazz útsetningum. Upptökur á disknum fóru fram í Amsterdam í febrúar síðastliðnum þar sem tveir meðlima tríósins stunda tónlistarnám í Hollandi.

Haldnir verða glæsilegir útgáfutónleikar í Hannesarholti, Reykjavík þann 16. júlí. Á tónleikunum verða að sjálfsögðu öll lög plötunnar flutt. Að flutningi loknum gefst tónleikagestum kostur á að kaupa plötuna á sérstöku tónleikaverði.

Hljómsveitin 23/8 og Björkologi

Jazzbandið 23/8 mun ferðast um landið nú í lok mánaðar og spila prógram sem þau kalla Björkologi en það samanstendur af vel völdum lögum úr safni Bjarkar og útsett á jazzvísu. Bandið skipa tvær íslenskar stelpur og tveir útlenskir strákar, öll búsett í Stokkhólmi.

Ljóst er að allir alvöru jazzgeggjarar og aðdáendur Bjarkar hreinlega verða að láta sjá sig ef eitthvað er að marka meðfylgjandi tóndæmi:

Tónleikar 23/8 verða haldnir á eftirfarandi stöðum:

23. júlí kl.21:00 Bryggjan, Grindavík, ókeypis
24. júlí kl.20:00 Norræna Húsið, Reykjavík, 2000 kr.
25. júlí kl.20:00 Norræna Húsið, Reykjavík, 2000 kr.
26. júlí kl.20:00 Stykkishólmskirkja, ókeypis
28. júlí kl.21:00 Græni Hatturinn, Akureyri, 2000 kr.
29. júlí kl.22:00 Gamli Bærinn, Mývatni, ókeypis

Tónleikahátíðin KEXPort verður haldin í fjórða skipti

Agent Fresco

Tónleikahátíðin KEXPort verður haldin í fjórða skiptið í portinu fyrir aftan KEX Hostel laugardaginn 18. júlí næstkomandi frá tólf á hádegi til miðnættis. Tónleikarnir eru haldnir til heiðurs KEXP í Seattle og munu koma fram tólf tónlistaratriði á jafn mörgum klukkustundum. KEXP er útvarpsstöð sem sótt hefur Ísland árlega allt frá árinu 2009 og hefur unnið óeigingjarnt starf til kynningar íslenskrar tónlistar í Bandaríkjunum og víðar í heiminum.

Hátíðin er haldin í portinu fyrir aftan Kex Hostel og eru þeir opnir almenningi á meðan rúm leyfir. Mikill stemmning er fyrir KEXPort í ár og er óhætt að segja að segja að fjölbreytni tónlistaratriða sé með besta móti.

Myndbandstöku af tónleikunum í ár verður streymt beint í gegnum KEXP.ORG, Kexland.is og MusicReach.tv og er það í fyrsta skiptið sem það verður gert.

Dagskrá tónlistaratriða er efirfarandi:

12:00 Sóley
13:00 Teitur Magnússon
14:00 Kælan Mikla
15:00 Futuregrapher
16:00 Markús and the Diversion session
17:00 Valdimar
18:00 Rökkurró
19:00 Muck
20:00 Gísli Pálmi
21:00 DJ Yamaho
22:00 Agent Fresco
23:00 Emmsje Gauti

Útgáfutónleikar Gísla Pálma í kvöld

Smekkleysa tilkynnir

…að annað upplag plötu Gísla Pálma verður dreift í verslanir í þessari viku. Á sama tíma fagnar Gísli Pálmi útgáfu fyrstu plötu sinnar með útgáfutónleikum í kvöld, þann 4. Júní, í Gamla Bíó.

Platan, sem kom út þann 16. apríl síðastliðinn, ber nafnið Gísli Pálmi, hefur hlotið einróma lof gagnrýnenda ásamt því að vera ein mest selda rapp plata síðustu ára.

Gísli Pálmi hefur fengið þá Sölva Blöndal og Egil Tiny úr Quarashi til að taka nokkur lög. Fleiri sem fram koma eru Sturla Atlas, Gervisykur og Vaginaboys.

Miðaverð er 2.900 kr. og er sala aðgöngumiða í Smekkleysu Plötubúð, Laugavegi 35., og á tix.is

LungA – Listahátíð ungs fólks

Lunga Art Festival by Magnus Elvar Jonsson1081
Í fréttatilkynningu segir:

Í sumar fagnar LungA hátíðin 15 ára afmæli sínu.
LungA er litrík, alþjóðleg listahátíð með fjölda viðburða í vikulangri dagskrá sem fer fram á Seyðisfirði dagana 12 – 19. Júlí. Á hátíðinni myndast einstakt samfélag þar sem fólk sækir innblástur í listir, umhverfið og hvort annað. Í fjölbreyttum listasmiðjum fá þátttakendur tækifæri til að kanna óþekktar hliðar á sjálfum sér og öðlast bæði ný tengsl og ógleymanlega reynslu.

Það er er ekki auðvelt að lýsa andrúmsloftinu á LungA. Prófessor Goddur orðaði það svona :

…það er sérstakt andrúmsloft hér sem erfitt er að lýsa. það er eins og að reyna að lýsa kynferðislegri fullnægingu fyrir fólki sem aldei hefur kynnst kynferðislegri fullnægingu – Seyðisfjörður er skapandi kynferðisleg fullnæging. Þú verður að upplifa hana til að skilja.

Í dag (1. júní) hefst miðasala á stórtónleika hátíðarinnar á tix.is og einnig verður opnað fyrir skráningar í listasmiðjur á www.lunga.is en síðast fylltust þær á fáeinum dögum!

Tónleikarnir verða hápunktur hátíðarinnar og fara fram laugardainn 18. júlí. Tónleikasvæðið við gömlu fiskvinnsluna verður ævintýraleg upplifun í sjálfu sér og á sérsmíðuðu sviði LungA koma fram hljómsveitirnar :

Sykur
Gangly
Grísalappalísa
Dj flugvél og geimskip
og Reykjavíkurdætur

Lára Rúnars gefur út Þel

Lára Rúnars - ÞelSíðast liðið ár hefur Lára Rúnars unnið að plötu í samstarfi við Stefán Örn Gunnlaugsson. Platan sem er draumkennd og ævintýraleg hefur fengið titilinn Þel og kom hún út nú í vikunni. Ólíkt fyrri plötum Láru þá er Þel öll samin og sungin á Íslensku. Þrjú laganna af plötunni hafa þegar komið út og ratað ofarlega á vinsældarlistum landsins.

Útgáfutónleikar í Fríkirkjunni 4.júní

Útgáfutónleikar plötunnar verða haldnir í Fríkirkjunni þann 4. júní og á Græna Hattinum Akureyri þann 5. júní. Lára Rúnars verður á tónleikaferðalagi um landið í sumar þar sem hún kynnir nýjustu plötuna sína ásamt því að spila annað gamalt og gott.

Hljómsveit Láru Rúnars skipa:

Arnar Þór Gíslason á trommur, Birkir Rafn Gíslason á gítar
, Guðni Finnsson á bassa, 
Þorbjörn Sigurðsson á hljómborð
, Rósa Guðrún Sveinsdóttir og Valdimar Guðmundsson blástur og söngur. Margrét Rúnarsdóttir, Rakel Pálsdóttir, Guðrún Ragna Yngvadóttir og Ásta Björg í bakröddum.

Extreme Chill Festival 2015 – Undir Jökli

ECF Poster

Íslenska tónlistarhátíðin Extreme Chill Festival – Undir jökli verður haldin helgina 7 – 9 ágúst næstkomandi á Hellissandi við rætur Snæfellsjökuls.

Þetta er í sjötta sinn sem hátíðin fer fram, en fimm ára afmæli hátíðarinnar var haldin í Berlín síðastliðið sumar við ótrúlegar undirtektir.

Dagskráin í ár er ekki af verri endanum en tónlistarmenn á borð við: Biosphere, Hilmar Örn Hilmarsson, Steindór Andersen, Mixmaster Morris, Studnitzky, Stereo Hypnosis, Dj Flugvél og Geimskip, Jónas Sen, Tonik Ensemble, Futuregrapher, Ruxpin, Skurken, Jóhann Eiríksson, o.fl. munu koma fram á hátíðinni.

Takmarkaðir miðar verða í boði í ár og kostar passinn á hátíðina aðeins 7900 kr. Við hvetjum því fólk til að tryggja sér passa tímanlega en síðustu ár hefur selst upp og komust færri að en vildu. Hægt er að nálgast miða inn á mida.is

Mjög gott tjaldsvæði er á Hellissandi, en það opnaði sumarið 2011 og er staðsett í fallegu hrauni er kallast Sandahraun. Á svæðinu er þjónustuhús með salerni, sturtum og vaskarými. Skemmtilegar gönguleiðir eru í næsta nágrenni, fallegar fjörur með öllum þeim ævintýrum sem þær bjóða uppá. Sólsetrin við Breiðafjörð séð frá Sandahrauni eru óviðjafnanleg og Þjóðgarðurinn Snæfellsjökull er næsti nágranni við tjaldsvæðið.

Frekari upplýsingar og dagskrá er að finna á heimasíðu Extreme Chill. www.extremechillfestival.com

Sumarmölin 2015

Sumarmölin 2015

Tónlistarhátíðin Sumarmölin fer fram í þriðja sinn í Samkomuhúsinu Baldri á Drangsnesi þann 13. júní næstkomandi. Hátíðin er rómuð fyrir einstaka stemningu þar sem fólk á öllum aldri kemur saman og nýtur frábærrar tónlistar í einstöku umhverfi.

Fyrir Sumarmölina í ár var rjóminn fleyttur ofan af íslensku tónlistarlífi og sett saman ómótstæðileg dagskrá þar sem allir ættu að geta fundið eitthvað við sitt hæfi.

Á hátíðinni í ár koma fram:
  • Sóley
  • Retro Stefson
  • Tilbury
  • Ylja
  • Borko
  • Kveld-Úlfur
  • Berndsen

16 ára aldurstakmark er á tónleikana en yngri tónleikagestir eru hjartanlega velkomnir í fylgd með fullorðnum.

Tónleikarnir hefjast klukkan 19:30 en húsið opnar um hálftíma fyrr.

Að tónleikum loknum munu FM Belfast DJar halda upp stuði og stemningu fyrir dansþyrsta tónleikagesti á Malarkaffi fram á nótt.

Miðaverð er 4500 kr. í forsölu
Hægt er að kaupa 2 miða og gistingu fyrir 2 á Malarhorni á aðeins 25.000 kr.
Aðgangur er ókeypis fyrir 12 ára og yngri.

Forsala aðgöngumiða fer fram á tix.is.

Árstíðir gefa út sína þriðju plötu

Árstíðir - Hvel

Í dag, föstudaginn 6. mars, gefur hljómsveitin Árstíðir út sína þriðju breiðskífu. Platan hefur hlotið nafnið Hvel og hefur hennar verið beðið með nokkurri eftirvæntingu, allt frá því hljómsveitin tilkynnti síðasta vor að efnt yrði til söfnunar í gegnum heimasíðuna Kickstarter til að fjármagna útgáfuna.

Markmiðinu var náð á einungis nokkrum dögum og áður en yfir lauk höfðu yfir 1500 manns lagt hljómsveitinni lið með fjárframlögum gegn loforði um að fá ýmsan varning sendan heim að dyrum. Auk plötunnar sjálfrar var t.a.m boðið uppá sérsniðnar íslenskar lopapeysur og ösku úr Eyjafjallajökli, svo dæmi séu tekin.

Það má segja að hljómur Árstíða hafi þróast og tekið ýmsum breytingum frá því síðasta plata, Svefns og vöku skil var gefin út árið 2011. Mannabreytingar hafa orðið á sveitinni í millitíðinni og ber nýji hljómurinn þess merki. Meðlimir hafa því að nokkru leyti fetað nýjar slóðir á nýju plötunni og gætir nú rafrænna áhrifa meira en á fyrri breiðskífum, auk þess sem trommuásláttur setur sinn svip á nokkur lög plötunnar.

Portraits of the Icelandic band Árstí?ir taken on-location at Toppstö?in power station in Reykjavík, Iceland. March 26, 2014.

Platan Hvel var samin og tekin upp að hluta til í gömlu rafstöðinni í Elliðaárdal, þar sem hljómsveitin hefur haft æfingaraðstöðu síðustu tvö árin. Upptökustjóri plötunnar er Styrmir Hauksson sem meðal annars hefur unnið með GusGus, Ásgeiri Trausta, Bloodgroup og Retro Stefson. Hljóðjöfnun annaðist Glenn Schick, en sá hefur hefur unnið með stórum listamönnum á borð við Elton John, Jutin Bieber og Skid Row.

Síðustu ár hefur hljómsveitin verið á ferð og flugi erlendis og spilað á tónleikum í meira en 30 löndum. Ekkert er lát á ferðalögum því í vor mun hljómsveitin fylgja Hvel á eftir með þremur tónleikaferðalögum um Þýskaland, Austurríki og Bretland, og í sumar er fyrirhugað sex vikna tónleikaferðalag um Bandaríkin.

Hljómsveitin gefur sjálf út og dreifir plötunni rafrænt, en er einnig með plötusamning við Þýska útgáfufyrirtækið Beste Unterhaltung sem gefur út plötur sveitarinnar í Bretlandi, Þýskalandi, Austurríki og Sviss.

Hvel er þriðja hljóðversplata Árstíða í fullri lengd, en áður hafa komið út plöturnar Árstíðir (2009), Svefns og vöku skil (2011) og Ep-platan Tvíend (2012) sem inniheldur endurhljóðblandanir (remix) af lögum sveitarinnar.

Tónleikar í kvöld, 6 Mars

Formlegir útgáfutónleikar verða síðan haldnir þegar nær dregur vori. En til að fagna útgáfunni mun hljómsveitin halda tónleika á Café Rósenberg í kvöld (föstudagskvöld), en segja má að hljómsveitin hafi byrjað feril sinn með tónleikahaldi þar. Tónleikarnir hefjast kl. 22:00 og verður nýja platan í boði á sérstöku tilboðsverði.

Reykjavík Folk Festival hefst í kvöld á Kex Hostel

Reykjavik Folk Festival

Í fréttatilkynningu segir:

Þjóðlagatónlistarhátíðin Reykjavík Folk Festival verður haldin í fimmta sinn á Kex Hostel við Skúlagötu dagana 5.- 7. mars 2015. Dagskrá hátíðarinnar er ætlað að blanda saman þjóðlagatónlistarmönnum og -hljómsveitum á ólíkum aldri og frá ólíkum áttum innan þjóðlagatónlistarheimsins. Hátíðin fer fram í notalegum húsakynnum Kex Hostels og verður ekkert til sparað við að skapa notalega og einlæga stemmningu og ógleymalega tónlistarveislu fyrir alla unnendur þjóðlagatónlistar.

Þeir listamenn sem koma fram á hátíðinni í ár eru; Teitur Magnússon, Ylja, Kólga, Funi, Moð, Lindy Vopnfjord (CA), Klassart, Lay Low, JP Hoe (CA), Björn Thoroddsen, Pétur Ben og Egill Ólafsson.

Fyrir hátíðina 2015 viljum við varpa ljósi á þjóðlagatónlistarhefð Kanada með hliðsjón af tengingu Íslands við Kanada og reyna að efla tengsl á milli þessara þjóða í gegnum þjóðlagatónlistarhefðina. Við bjóðum því tveimur kanadískum listamönnum frá Winnipeg sem eiga ættir að rekja til Íslands, þá Lindy Vopnfjörð og JP Hoe velkomna á hátíðina.

Miðaverð á hátíðina er 3.000 kr fyrir stök kvöld en 7.999 kr fyrir passa sem gildir á öll 3 kvöldin. Dagskrá hátíðarinnar hefst kl. 20 öll kvöl og líkur kl. 23:30.

Miðasala fer fram á Tix.is