Úlfur Eldjárn gefur út nýtt lag

Úlfur Eldjárn

Úlfur Eldjárn hefur gefið út lagið “Poyekhali!” sem er tileinkað mestu hetju Sovétríkjanna, Júrí Gagarín, fyrsta manninum til þess að fljúga út í geim. Lagið var frumflutt á dögunum á hinni virtu útvarpsstöð KEXP í Seattle.

“Poyekhali!” er fyrsta lagið sem kemur út af væntanlegri sólóplötu Úlfs – The Aristókrasía Project – en efni plötunnar var frumflutt í heild sinni á tónleikum á vegum Blikktrommunnar í Hörpu miðvikudaginn 7. október síðastliðinn.

Úlfur er þekktastur fyrir störf sín sem meðlimur í Orgelkvartettinum Apparat (Apparat Organ Quartet) en sem tónskáld hefur hann getið sér gott orð bæði fyrir tilraunakennd og óvenjuleg verkefni – eins og Strengjakvartettinn endalausa infinitestringquartet.com – en einnig hefur hann hefur samið mikið af tónlist fyrir kvikmyndir, sjónvarpsþætti, leikrit og jafnvel tölvuleiki.

Elín Helena bara spyr

Elín Helena hendir spurningum út í kosmósinn! Það þarf einhver að spyrja áleitna spurninga og því ekki partípönksveitin? Já, því ekki?

Hljómsveitin skellti sér hljóðver á dögunum og tók upp tvö lög; lifandi, hratt og pönkað. Hér er hið fyrra: “Ég bara spyr”. Á sama tíma henti bandið í official lyric video sem er heitasta heitt hjá krökkunum í dag.

MIRI gefur út nýtt lag og myndband

Hljómsveitin MIRI gaf nýverið út nýtt lag sem nefnist “When you look in my eyes do you see the fire that burns in me?” og myndband við. Er þetta fyrsta útgáfa hljómsveitarinnar í ein fimm ár, eða allt frá því að breiðskífan Okkar kom út á vegum Kimi Records hér á Íslandi og í evrópu og Bandaríkjunum í samstarfi við þýska útgáfufyrirtækið Morr Music.

Eftir að hafa legið í dvala er MIRI tekin til starfa af fullum krafti og mun hún meðal annars koma fram á Iceland Airwaves í nóvember næstkomandi.

Wish I Knew – ný smáskífa með Önnu Sóley

Söngkonan og lagasmiðurinn Anna Sóley hefur sent frá sér nýja smáskífu sem nefnist “Wish I Knew”. Stíllinn er persónulegy jazzað fönk í sálrænum búningi. Tríóið sem spilar á upptökunni er skipað einvala liði, Magnús Trygvason Eliassen á trommur, Pétur Sigurðsson á bassa og Mikael Máni Ásmundsson á gítar.

Upptaka, hljóðblöndun og tónjöfnun var í höndum Birgis Jóns Birgissonar og voru herlegheitin tekin upp í Sundlauginni.

Gunman & The Holy Ghost

GUNMAN & THE HOLY GHOST

Önnur breiðskífa hljómsveitarinnar Gunman & The Holy Ghost kemur út 9. október næstkomandi og heitir The Story of Radiate and Novocaine. Hljómsveitin starfar í Berlín og platan tekin upp þar og sá BJ Nilsen um upptökustjórn. 8mm Musik gefur út en Cargo sér um dreifingu, en platan verður fáanleg á vínyl, geisladiskum og stafrænu formi. Fyrsta plata sveitarinnar kom út árið 2011 og heitir Things to Regret or Forget, var gefin út af ‘a’ Recordings ltd. og var lofuð bæði af íslenskum og erlendum gagnrýnendum.

Upplýsingar um þá sem komu að plötunni:

Lög og textar: Hákon Aðalsteinsson
Upttökustjórn: BJ Nilsen
Hljóðblöndun: Hákon Aðalsteinsson og BJ Nilsen
Mastering: Ryan Carlson van Kriedt

Hljóðfæraleikur: Hákon Aðalsteinsson: Söngur, bakraddir, gítarar, píanó hljóðgerflar ofl. Símon Rúnarsson: Trommur. Antonio D’Orazio: Bassi. Ingólfur Máni Thomasson: Gítar og banjó. Golbarg Zolfaghari: Orgel og hristur. Ambroise Prieur: Saxófónn.

A & E Sounds gefa út sína fyrstu breiðskífu

A & E Sounds - LP

Hljómsveitin A & E Sounds hefur sent frá sér 8 laga plötu á vínyl og stafrænu formi og nefnist hún A & E Sounds – lp. Er þetta fyrsta breiðskífa sveitarinnar.

Þórður Grímsson sér um texta- og lagasmíðar ásamt útsetningum á plötunni og Orri Einarsson leikur á trommur og slagverk. Fleiri tónlistarmenn koma fram á plötunni m.a. Þóranna Björnsdóttir, Steinar Logi, Maxime Smári, Jessica Meyer og karlakórinn Bartónar. Upptökustjóri er Kolbeinn Soffíuson sem, ásamt Þórði, sá einnig um hljóðblöndun, masteringu og framleiðslu á plötunni.

Jafnframt er A & E Sounds – lp fyrsta útgáfa stúdíósins Konsulat sem Kolbeinn og Þórður standa á bakvið.

Hide Your Kids gefa sína fyrstu plötu frítt

Hide Your Kids

Hljómsveitin Hide Your Kids var að senda frá sér sína fyrstu EP plötu, en platan nefnist Lovestories. Hægt er að nálgast plötuna frítt á www.hideyourkids.is sem og á Spotify og helstu tónlistarveitum heims. Á henni má meðal annars finna lagið “Mia” sem var lengi vel á vinsældarlista X-977 og Rás 2. Nýjasta smáskífan “About Time” er svo í spilun eins og er. Hide Your Kids munu svo spila á Iceland Airwaves í ár líkt og í fyrra.

Nýtt efni frá KAJAK

KAJAK

Nýjasta smáskífa rafpoppsveitarinnar KAJAK hefur litið dagsins ljós og ber nafnið “Wake up”. Lagið er það síðasta sem finna má á fyrstu opinberu útgáfu sveitarinnar Children Of The Sun sem er væntanleg á helstu tónlistarveitur veraldarvefsins á næstu vikum.

Nónfjall með Skurken komin út

Skurken - Nónfjall

Raftónar hafa gefið út breiðskífuna Nónfjall með raftónlistarmanninum Skurken. Um er að ræða fjórðu breiðskífu hans og er hún allt í senn myndræn, dýnamísk og stemningsfull – og haldbær sönnun þess að hið hreinræktaða “heiladansform” lifir enn góðu lífi.

Jóhann Ómarsson (Skurken) er fæddur í Reykjavík árið 1977. Hann hefur lengi vel verið einn virtasti raftónlistarmaður landsins og eftir hann liggja þónokkrar útgáfur. Síðasta breiðskífan hans Gilsbakki, sem kom út á vegum Möller Records árið 2011, fékk rífandi dóma hjá gagnrýnendum. Jóhann er einnig einn af stofnendum Möller Records, sem hafa staðið að útgáfu á íslenskri raftónlist í hartnær fjögur ár.

Útgáfan verður fáanleg á geisladisk, sem og stafrænt.

Bedroom Community gefur út frumraun Jodie Landau

you of all things by Jodie Landau and wild Up
Í fréttatilkynningu segir:

Það er ekki á hverjum degi sem Bedroom Community bætir við sig listamönnum, en í ár gefur útgáfan út tvær plötur nýrra listamanna.

Fast á hæla útgáfu Folie à Deux með Emily Hall (20. júlí) gefur Bedroom Community út frumraun hins 23 árs gamla Jodie Landau ásamt nýstárlegu tónlistarsamsteypunni Wild Up. Platan ber nafnið You of all things og kemur út 2. október næstkomandi. Nú má forpanta hana á bandcamp og hlusta á fyrsta lag hennar, “An invitation”.

Jodie Landau er tónskáld, söngvari og slagverksleikari. Tónlist hans tvinnar saman ólíkum stefnum svo sem kammer, rokki og djass fyrir tónleika, kvikmyndir, leikhús- og dansverk. Þegar hann kemur fram einsamall singur hann ásamt því að spila á víbrafón og marimbu.

Wild Up er djörf kammersveit frá Los Angeles sem stefnir að því að skapa umhugsunarverð verk. Tónlistarfólk Wild Up trúir því að tónleikastaðir séu til þess gerðir að útbúa áskoranir, vekja spennu og sameina hlustendur.

Mixophrygian fagnar útgáfu sinnar fyrstu breiðskífu á KEX Hostel

Mixophrygian

Eins manns hljómsveitin Mixophrygian heldur útgáfutónleika á Kex Hostel miðvikudagskvöldið 2. September kl. 21:00. Hljómsveitina skipar Daði Freyr Pétursson.

Platan kemur fyrst út eingöngu á netinu, verður fáanleg á iTunes og Bandcamp, einnig verður hægt að streyma henni frítt í gegnum Spotify og Soundcloud. Seinna á þessu ári kemur hún síðan út á tvöfaldri vínylplötu í 300 eintökum sem var fjármagnað með crowdfunding síðunni Indiegogo.

Þetta er 14 laga consept plata, þar sem lögin eru sett upp eins og saga þegar hún er spiluð í heild sinni. Þetta verður í fyrsta og jafnvel eina skyptið á Íslandi sem platan verður tekin í heild sinni í réttri röð. Sagan fyrir hvert lag verður líka sögð. Þetta verða einu tónleikar Mixophrygian á Íslandi í ár þar sem viku eftir tónleika fer Daði út til Berlínar þar sem hann stunda nám við DBs music skólann, en þar verða haldnir fleiri tónleikar á þessu ári.

Meira má finna á heimasíðunni www.mixophrygia.com

Reykjavík Guitarama

Reykjavík Guitarama

Al Di Meola, Robben Ford, Björn Thoroddsen, Peo Alfonsi og Brynhildur Oddsdóttir á magnaðri gítarveislu Bjössa Thor í Háskólabíói, laugardaginn 3. október.

Þessa tónleika má enginn tónlistaráhugamaður láta fram hjá sér fara. Al Di Meola er einfaldlega einn virtasti gítarleikari sögunnar og Robben Ford er meðal fremstu blústónlistarmanna samtímans, sannur snillingur sem hefur spilað með þeim bestu, s.s. George Harrison, Miles Davis og Kiss.

Ítalski gítarleikarinn Peo Alfonsi og blúsarinn Brynhildur Oddsdóttir verða í sviðsljósinu ásamt gestgjafanum Birni Thoroddsen sem haldið hefur vinsælar gítarhátíðar í Kanada, Noregi og Bandaríkjunum.

Jóhann Hjörleifsson trommuleikari og Róbert Þórhallsson á bassaleikari sjá til þess að allir haldi takti.

Miðasala er hafin á Miði.is

Rúnar Þórisson sendir frá sér áttunda lagið í verkefninu “Eitt lag á mánuði”

Það er ekki seinna vænna, nú síðasta dag ágústmánaðar, að birta áttunda lagið í verkefni Rúnars Þórissonar sem hann kallar Eitt lag á mánuði. Lagið heitir “Hvert sinn” en það er masterað af Denis Blackham sem masterað hefur fyrir Led Zeppelin, Brian Eno og Antony & the Johnsons svo einhverjir séu nefndir.

Um texta lagsins segir Rúnar:

Lagið og fjallar það um ástina sem í upphafi kveiknar af neista milli tveggja einstaklinga, neista sem fær að dafna í gegnum lífið, bera ávöxt og skapa af sér nýja einstaklinga, nýtt líf og nýja ást, kynslóð fram af kynslóð.

Nýtt lag frá Hjalta úr Múgsefjun

Hjalti Þorkelsson - Mælum myrkrið út

Hjalti Þorkelsson, sem flestir kannast eflaust við sem meðlim hljómsveitarinnar Múgsefjun, vinnur nú að sólóplötu og hefur fyrsta lagið af henni litið dagsins ljós. Nefnist það “Mælum myrkrið út” og hljómar hér að neðan. Gjörið svo vel.

Bedroom Community kynnir Folie à Deux, frumraun breska tónskáldsins Emily Hall

Folie à Deux by Emily Hall

Bedroom Community kynnir með stolti útgáfu Folie à Deux, frumraun breska og margverðlaunaða tónskáldsins Emily Hall. Platan kom út 20. júlí síðastliðinn.

Með útgáfu þessari bætist tíundi listamaður við útgáfufyrirtækið og önnur kona þess. Það er ekki oft sem Bedroom Community bætir við sig listamönnum og er þetta því gleðiefni, sér í lagi að rétta kynjahlutfallið aðeins.

Plötuna má nálgast á Bandcamp þar sem einnig er hægt að streyma laginu “mantra”, en hin virta vefsíða BlackBook Magazine hafði þetta um lagið að segja:

The wonderfully-composed song starts off soft and gradually builds in its sweet intensity—adding to the album’s acute emotional understanding and sensory “investigation into love and loneliness within a relationship.

Folie à Deux inniheldur texta eftir Sjón og var unnin í Gróðurhúsinu hljóðveri með Valgeir Sigurðsson við stjórnvölinn. Platan er konseptplata um tvo elskendur og var upphaflega verkið pantað af Mahogany Opera Group. Flytjendur eru hin sænska söngkona Sofia Jernberg, breski tenórinn Allan Clayton, hörpuleikarinn Ruth Wall og slög frá Mira Calix. Emily Hall notast við nýtt hljóðfæri sem hún lét útbúa sérstaklega fyrir verkið, svokallaða raf-hörpu, sem ljáir plötunni sérstakt hljóð.

VAX gefur út Voice 14, ellefta lagið af væntanlegri plötu

Vax

Ellefta lagið af Its all been done, tilvonandi breiðskífu VAX, heitir “Voice 14” og kom lagið á vefinn síðastliðinn föstudag eftir frumflutning í Popplandi.

Við vinnsluna á laginu var það hljóðgjafinn, hljómasamsetningin, takturinn, laglínan og svo textinn sem smullu saman við fyrsta rennsli. Nafnið er vísun í að þegar verið var að taka upp demo var notaður forláta snjallsími til upptöku og gaf hann skránum (lögunum) nöfnin “Voice 1”, “Voice 2” o.s.frv.

VAX mun gefa út eitt lag á viku af væntanlegri plötu þar til öll 15 lög plötunnar hafa séð dagsins ljós. Útgáfudagur Its All Been Done verður 15.10. næstkomandi.

Jazzhátíð Reykjavíkur 2015

Jazzhátíð Reykjavíkur verður haldin í 26. sinn dagana 12.-16. ágúst í Hörpu. Hátíðin í ár leggur áherslu á nýsköpun, íslenska útgáfu og samstarfsverkefni innlendra og erlendra tónlistarmanna. Jafnframt er sérstakur fókus á konur í jazzmúsík í tilefni af 100 ára kosningarafmælis kvenna á íslandi.

Snorri Sigurðarson

Mikill fjöldi af nýjum íslenskum jazzútgáfum verður kynntur á hátíðinni í ár og er það til marks um mikla grósku í íslensku jazzlífi. Trió Sunnu Gunnlaugsdóttur, Mógil, Scott McLemore ásamt Hilmari Jenssyni og Angeliku Niescier, Jónsson&More, Sigurður Flosason, Leifur Gunnarsson, Ásgeir Ásgeirsson, Tómas R. Einarsson ásamt Ómari Guðjónssyni kynna öll nýjar útgáfur á hátíðinni í ár og frumflytja efni sitt á Jazzhátíð Reykjavíkur 2015.

Tómas R.Jazzhátíð í ár verður þjófstartað í Bíó Paradís, þriðjudaginn 11. ágúst, með frumsýningu á nýrri heimildarmynd í leikstjórn Jóns Karls Helgasonar. Efnistök myndarinnar er Tómas R. Einarsson kontrabassaleikari og lagahöfundur sem er löngu landskunnur, ekki síst fyrir latín tónlist sína. Í kvikmyndinni Latínbóndinn kynnumst við manninum bak við bassann og lögin og því hvernig það vildi til að sveitastrákur úr Dölunum elti tónlistargyðjuna út í heim og alla leið til Havana á Kúbu og snéri loks til baka í heimahagana með heita og litríka latínveislu í farangrinum.

Nánari upplýsingar um hátíðina er að finna á www.reykjavikjazz.is og á Facebook www.facebook.com/Rvk.Jazz